Tbilisi Gran prisi. Umumjamoa hisobida 15-o'rinni egalladik

Uch kuni davom etgan musobaqada 52 davlat dzyudochilari turnir medallari hamda Tokio-2020 Olimpiadasining muhim reyting ochkolari uchun tatamiga chiqishdi. Ular orasida O'zbekiston terma jamoasining 6 nafar azosi ham bor edi. 

Hamyurtlarimizdan -60 kg vazn toifasida SHarofiddin Lutfullaev hamda -100 kg vazndagi polvonimiz Muhammadkarim Xurramov bronza medali hamda 350 reyting ochkosini qo'lga kiritishdi. -90 kg vaznli dzyudochimiz Davlat Bobonov esa 5-o'rin hamda 250 reyting ochkosiga ega bo'ldi. 

Umumjamoa hisobida terma jamoamiz 15-o'rinni egalladi. Uchta oltin, bitta kumush, 3ta bronza medalini qo'lga kiritgan Franciya terma jamoasi birinchi o'rinni egalladi. Ikkita oltin, 2ta kumush, 6ta bronza medaliga sazovor bo'lgan Gruziya terma jamoasi ikkinchi bo'ldi. Kuchli uchlikka 2ta oltin, bitta kumush, 3ta bronza medali bilan Gollandiya terma jamoasi yakun yasadi. 

To'rtinchi o'rindan joy olgan Kosovo terma jamoasi dzyudochilari ikkita oltin medal bilan uyga qaytishdi. Kuba, Isroil, Portugaliya, Rossiya va Italiya terma jamoalari turnirda bittadan oltin medalni qo'lga kiritishdi. Jami 18 davlat sportchilariga kamida bitta bronza medali nasib qildi.