Terma jamoalarimiz funkcional tekshiruvdan o'tkazilmoqda

Uning doirasida Rossiya Olimpiya qo'mitasi huzuridagi innovacion markazining tor doiradagi tajribali mutaxassislari (Pavel Karneev, Evgeniy Rassudixin, Anna Eliseeva, Yuliya Lemesheva) ikkinchi bor bir qator sport turlari bo'yicha terma jamoamiz vakillarini funkcional tekshiruvdan o'tkazishmoqda. Jarayon Milliy olimpiya qo'mitasi qoshidagi Respublika sport tibbiyoti ilmiy-amaliy markazida o'tmoqda. Tekshiruvlarni MOQ prezidenti Rustam SHoabdurahmonov ham kuzatib bormoqda. Suhbat davomida sportchilar bilan yuzaga kelishi mumkin bo'lgan muammolarning oldini olish, atletlarimizning salomatligini jiddiy nazorat qilib borish borasida tegishli ko'rsatmalar berildi.

Takidlash joiz, MOQ rahbari iyul oyida Moskvada Rossiya Olimpiya qo'mitasi huzuridagi innovacion markazi direktori Sergey Zotkin bilan uchrashib, Tokio Olimpiadasiga tayyorgarlik doirasida o'zaro hamkorlikda ishlash bo'yicha kelishib olgan edi. 

Ayni paytgacha suv polosi, triatlon, dzyudo, taekvondo, sport kurashlari kabi terma jamoalar tekshiruvdan o'tgan bo'lsa, oldinda qilichbozlik, engil atletika, karate, baydarka va kanoechilarimiz ham rossiyalik mutaxassislar ko'rigidan o'tishi rejalashtirilgan. 

Tekshiruv davomida qon tahlillari olinib,  sportchilarning individual jismoniy va psixologik holatlari bo'yicha chuqurlashtirilgan tekshiruv olib boriladi. Unda terma jamoadagi har bir sportchining fiziogologik holati, jismoniy yuklamalarning maksimal darajasi, harakat vaqtida yurak-qon tizimining faoliyati, muskullarning rivojlanish darajasi atroflicha o'rganiladi.