Termizda karate WKF bo'yicha “Surxon Open- 2021” xalqaro turniri o'tkazildi

O'zbekiston Respublikasi Prezidentining 2017 yil 3 iyundagi “Jismoniy tarbiya va ommaviy sportni rivojlantirish chora-tadbirlari to'g'risida”gi qarori ijrosini taminlash, shuningdek, yoshlar o'rtasida jismoniy tarbiya va sportni, xususan, karate sport turini keng ommalashtirish, iqtidorli sportchilarni saralash maqsadida tashkil etilgan mazkur ochiq turnirda Toshkent shahri, Namangan, Toshkent, Sirdaryo, Qashqadaryo viloyatlari hamda qo'shni Qirg'iziston va Tojikiston Respublikalaridan 300 nafardan ortiq sportchilar g'oliblik uchun kuch sinashishdi.

Surxondaryo viloyati Turizm va sport bosh boshqarmasi, O'zbekiston karate milliy federaciyasi, Surxondaryo viloyat karate federaciyasi hamkorligida ikki kun davomida o'tkazilgan ushbu bellashuvlarning yakuniy natijalariga ko'ra, har bir vazn toifasida kuchli uchlikdan joy olgan yosh karate ustalari musobaqa tashkilotchilari tomonidan diplom, medal va esdalik sovg'alari bilan taqdirlanishdi.

Dilshod YUSUPOV, Toshkent tumani bolalar-o'smirlar sport maktabining karate WKF murabbiyi, “Keles karate” klubi rahbari: 

- Musobaqada Toshkent viloyatining Bekobod shahridagi hamda Toshkent tumanidagi bolalar-o'smirlar sport maktablarida karate bo'yicha muntazam mashg'ulotlarga qatnayotgan yosh karatechilarimiz bilan ishtirok etdik. Yuqori saviyada tashkil etilgan ochiq turnirda shogirdlarimiz muvaffaqiyalatlarga erishib, medallarga ega chiqishdi. Bekobod shahridagi BO'SM va “Humo” karate klubidan 6-8 yoshlilar o'rtasida Davlatbek Abdullaev, Javohir Xalimboev, Oybek SHuhratov, Umar Ergashboev, 10 yoshdan 13 yoshgacha bo'lgan bolalar o'rtasida Toshkent tuman BO'SM hamda “Keles karate” klubimizdan Muhammadumar Mirhakimov, Muhammaddiyor Mansurov, Saidkamol Adilov, Jo'rabek Alibekovlar kuchli uchlikdan joy olib, medallarga sazovor bo'lishdi. Maqsadimiz, o'g'il-qizlarimizni sportga keng jalb etish va istedodlarini yuzaga chiqarib, bu kabi musobaqalarda ishtirokini taminlash, katta sport sari etaklashdan iborat.    

Ilhom RAHMONOV tayyorladi