To'lqin Qilichev Bahodir Jalolovning jangiga bormaganligi haqida: Olimpiada chempioniga nima o'rgatish mumkin

Murabbiy To'lqin Qilichev yakunlangan O'zbekiston chempionati va Bahodir Jalolovning jangiga nima sababdan bormaganligi haqida gapirdi.

«Avvalo, yakunlangan O'zbekiston chempionati haqida gapisam, o'zbek boksi tarixida ilk bor xalqaro hakamlar janglarni baholab bordi. Ular yurtimizdagi boks muhitini ko'rib hayron bo'lishdi. Bu paytgacha bunaqasini ko'rmaganmiz deb, xursand bo'lib ketishdi. Respublika birinchiligini yakunlab, yangi bir musobaqaga shay turibmiz. Asosiy jangda Isroil Madrimov hammamizni xursand qiladi deb o'ylayman. Ishonamanki, yigitlarning barchasi yuzimizni yorug' qiladi. Bunday darajadagi katta boks oqshomlariga mezbonlik qilishdan asosiy maqsad ham bokschilarimizning ishonchli g'alabaga erishib tezroq chempionlik kamarlari tomon qadam tashlashlaridir.

Bahodir Jalolov bilan nega Dubayga bormadim? O'zbekiston chempionatida yangi nomlarni kashf etish, yoshlarni saralash uchun Bahodirning jangiga bormadim. Rahmatjon akamni jo'natdim. Rahmatjon Ro'zioxunov juda tajribali murabbiy. Bahodirga bu jangda katta etibor shart emas deb o'yladim. CHunki Jalolov Olimpiada chempioni. Olimpiada chempioniga nima o'rgatish mumkin? Kerakli ko'rsatmani aytib tursangiz, hammasini o'zi uddalaydi degan fikrda Rahmatjon akam bordilar va shukurki, ular g'alaba qozonishdi. Bugungi jangda barcha bokschilarimizga omad tilayman», - dedi To'lqin Qilichev.