"Toshkent-2025" o'yinlarida doping nazorati qay tartibda olib boriladi?

Ayni kunlarda mamlakatimizda ilk bor tashkil etiladigan “kichik olimpiada” musobaqalarini har jihatdan yuqori darajada o'tkazish, tashkiliy ishlarni xalqaro talablar asosida uyushtirish borasida bir qator ishlar amalga oshirilmoqda.  

Bu boradagi ishlarda O'zbekiston Milliy antidoping agentligi mutaxassislari ham faol ishtirok etmoqda. Kuni kecha Milliy antidoping agentligi direktori A.Sodiqov va masul mutaxassislar Osiyo olimpiya kengashi tashkiliy qo'mitasi vakillari bilan doping nazorati bo'yicha muloqot o'tkazdi.  

Onlayn tarzda o'tgan muloqot davomida "Toshkent-2025" o'yinlarida qatnashadigan sportchilardan doping sinamalar olish jarayoni qay tartibda amalga oshirilishi, natijalarni elon qilish tartibi va boshqa qator masalalar xususida fikr yuritildi.  

SHuningdek, poytaxtimizda bunyod etilayotgan “Olimpiya shaharchasi”da yangi barpo etilayotgan inshootlar va sport maydonlarida doping nazoratini amalga oshirish uchun yaratilgan shart-sharoitlar yuzasidan taqdimot o'tkazildi. O'z navbatida mutasaddilar tomonidan oldinda qilinishi kerak bo'lgan ishlar bo'yicha tavsiyalar berildi.