Toshkentda sport kurashlari bo'yicha o'smirlar o'rtasidagi Osiyo chempionati boshlandi

"O'zbekiston" sport majmuasi mezbonlik qiladigan qita chempionati oktyabr oyida Buenos-Ayres shahrida o'tkaziladigan III yozgi o'smirlar Olimpiya o'yinlariga yo'llanmalar ham taqdim etadi.

Ushbu musobaqada Osiyoning Xitoy, Hindiston, Eron, Iroq, Iordaniya, Yaponiya, Qozog'iston, Qirg'iziston, Janubiy Koreya, Saudiya Arabistoni, Mo'g'uliston, Pokiston, Singapur, Suriya, Tailand, Tojikiston, Turkmaniston, Tayvan, Yaman va O'zbekiston kabi 21 ta davlatidan 400 nafarga yaqin sportchi va murabbiylar ishtirok etadilar.

Malumot uchun, har uchchala yo'nalish (erkin, yunon-rum va ayollar kurashi) bo'yicha beshta vazn toifasida (o'smirlar Olimpiya o'yinlari dasturiga kiritilgan vaznlar) chempionlikni qo'lga kiritgan sportchilar licenziya sohibiga aylanadilar. Demak, qita chempionatida o'smirlar Olimpiya o'yinlariga jami 15 ta licenziya o'z egasini topadi.

Musobaqada umumiy hisobda 30 ta medallar jamlanmasi o'ynaladi. Qayd etish lozimki, ushbu musobaqada g'oliblikni qo'lga kiritgan sportchilar oltin medallardan tashqari, Osiyo chempionatlari tarixida ilk marotaba tashkilotchilar tomonidan tayyorlangan maxsus chempionlik kamariga ham ega bo'ladilar.

Ayni paytda yunon-rum kurashi bo'yicha –45, -48, -51, -55, -60, -92, -110kg vazn toifalarida finalchilar aniqlanmoqda.

Hozircha hamyurtlarimizdan L.O'zbekov (-51kg) qozog'istonlik raqibini mag'lubiyatga uchratib, keyingi davraga yo'l oldi. K.Yunusxonov (-45kg) va Muhammadali Saydullaev -(110kg)lar esa afsuski ilk bosqichdayoq imkoniyatni boy berib qo'yishdi.  

Soat 17:30da musobaqaning tantanali ochilish marosimi bo'lib o'tadi. 18:00dan boshlab esa final bellashuvlari start oladi. Demak, Buenos-Ayresga dastlabki yo'llanmalar egalari nomi aniq bo'ladi.