Toshkentda Xaver Mendes ishtirokida tadbir o'tkazildi. U Xabibning qaytishi haqida gapirdi FOTOGALEREYA

Xabib Nurmagomedovning ustozi hisoblangan Xaver 1978 yilda yakkakurash sport turlari bilan shug'ullana boshlagan. Avvaliga taekvondo, keyin esa kikboksing bilan oshno tutingan. 1985 yilda kikboksingga o'tgan Mendes 1992 yil jahon chempionatining oltin medalini qo'lga kiritgan. 1995 yilda esa og'ir vaznda jahon chempioniga aylangan. 1996 yilda o'zini MMA, yani aralash yakkakurash janglarida sinab ko'rishga qaror qiladi. Aniqrog'i, sportchi emas, murabbiy sifatida Brayan Jonsonga kikboksing sir-asrorlarini o'rgatadi. Ayna o'sha onlardan etiboran Xaver Mendesning MMA olamidagi faoliyati boshlanadi. Uning UFC promoushenidagi ilk chempion shogirdi Frenk SHemrok bo'lgan. Frenk 1997 yilda Xaver qo'l ostida dunyoning eng kuchli MMA ligasida chempionlik kamarini qo'lga kiritgan. SHundan so'ng navbati bilan Keyn Velaskes, Deniel Korme, Lyuk Rokxold hamda Xabib Nurmagomedov ham Mendes boshchiligida UFC chempioni bo'lishadi. Yaqindagiga faoliyatini yakunlagan Korme ikki vaznda chempion bo'la olgan. Xabib esa mag'lubiyatsiz (29-0) faoliyatini tugatdi. Xaver asos solgan AQSHdagi AKA (American Kickboxing Academy) zali aynan yuqorida nomlari keltirilgan chempionlar evaziga butun dunyoda mashhur bo'lib ketgan.

Bugun ana shunday ism-sharifi katta xarflar bilan yoziladigan murabbiy ishtirokida matbuot anjumani hamda sportchilar uchun mahorat saboqlari tashkil etildi. Be Fit Pro sog'lomlashtirish markazida tashkil etilgan tadbirda nafaqat MMA sportchilari, balki boks, taekvondo, sambo, dzyudo kabi yakkakurash vakillari hozir bo'lishdi. Marosimning birinchi qismida sportchi va murabbiylar o'zlarini qiziqtirgan savollarga javob olishdi. Savol berganlar orasida dzyudo bo'yicha O'zbeekiston terma jamoasi bosh murabbiyi, Olimpiada chempioni Ilias Iliadis ham bor edi.

- Yakkakurash sport turi vakillari musobaqa oldidan vazn tashlashda qiyinchilikka duch kelishadi. Sizningcha, bu holatda nimaga etibor berish kerak? 

- Birdaniga ko'p vazn tashlab bo'lmaydi. Sportchi ikki-uch kunda 6-8 kilogramm vaznni haydaydi. Men bu narsani to'g'ri deb hisoblamayman. Qisqa fursatda ko'p vazn tashlagan sportchining jismoniy holati talab darajasida bo'lmaydi. Katta energiya yo'qotishi natijasida kuchdan ketadi. Bu esa ko'pincha mag'lubiyatga olib keladi. SHu boisdan ham musobaqaga bir necha kun qolganda reja asosida ortiqcha vaznni yo'qotib borilsa, maqsadga muvofiq bo'ladi. 

Mendes eng yaxshi savol bergan sportchilarga dastxati tushirilgan MMA qo'lqopini taqdim etdi. Sovg'aga loyiq ko'rilganlar orasida dzyudo bo'yicha terma jamoamiz azosi Muzaffarbek To'raboev ham bor edi. 

SHundan so'ng Xaver Mendes ishtirokida master-klass, yani mahorat saboqlari tashkil etildi. Taniqli murabbiy MMA bo'yicha terma jamoamiz azolari bilan birga yarim soatdan oshiqroq vaqt mobaynida mashg'ulot o'tkazib berdi. 

O'zbekiston Aralash jang sanatlari associaciyasi rais o'rinbosari SHerzod Tashmatov mahorat saboqlari yakunida dzyudo, taekvondo, sambo va boks bo'yicha terma jamoamiz azolariga associaciya nomidan sovg'alar taqdim etdi.

Tadbirning so'nggi uchinchi qismida ommaviy axborot vositalari xodimlari uchun matbuot anjumani o'tkazildi. Jurnalistlar o'zlarini qiziqtirgan savollarga javob olishdi. Tabiiyki, savollarning aksariyati Mendesning chempion shogirdi Xabib Nurmagomedov haqida bo'ldi.

"Ochig'i, Xabibning faoliyatini yakunlashini ko'pchilik qatori u elon qilganidan so'ng eshitdim. U men bilan maslahatlashmadi. Qarorni o'zi qabul qildi. Bundan xafa bo'lganim yo'q. CHunki, u professional va aqlli sportchi. Nima qilayotganini juda yaxshi biladi. Xabib oktagonga qaytadimi? To'g'risi, buni bilmayman. Agar onasi unga ruxsat bersa, biz Xabibni yana oktagonda ko'ramiz", - dedi Mendes.