Toshkentga konkur havosi kirib kelmoqda

21-23 aprel kunlari poytaxtimizdagi “Universal Horses Stable” majmuasida konkur bo'yicha ananaviy tarzda o'tkazib kelinadigan Jahon kubogining Evrosiyo ligasi bosqichi, 27-30 aprel kunlari esa Evrosiyo ligasining Millatlar kubogi hamda "Maxsima Masters" Gran-pri turniri bo'lib o'tadi.

17 aprel kuni mazkur musobaqada ishtirok etadigan sport otlari Frankfurt-Toshkent yo'nalishi bo'yicha maxsus reysda poytaxtimizga olib kelindi. Tulporlar Islom Karimov nomidagi Toshkent xalqaro aeroportidan belgilangan tartibda bazaga jo'natildi.

Otlar bir necha kunlik tiklanish jarayoni, sanitar ko'riklardan so'ng mashg'ulotlarga qo'yiladi. Eslatib o'tamiz, Evrosiyo ligasi bosqichilarining yakunida kelasi yil bo'lib o'tadigan Jahon kubogining final bosqichi ishtirokchisi aniqlab olinadi.

Mazkur nufuzli musobaqaga Evrosiyo ligasiga kiruvchi 11 mamlakatdan tashrif buyuradigan chavandozlar, shuningdek, O'zbekiston yilqichilik va ot sporti federaciyasining taklifiga binoan SHveciya, Germaniya, Franciya, Italiya, Niderlandiya, Polsha, Xitoy, Yaponiya, Oman, Qatar, Eron, Hindiston kabi 20 mamlakatdan mehmonlar kelishadi.

Demak, ot sporti ishqibozlarini 21-23 va 27-30 aprel kunlari “Universal Horses Stable” majmuasida o'tadigan qiziqarli bellashuvlarni tomosha qilishga taklif etamiz. Musobaqaga kirish bepul.