"Tur de Frans"da ishtirok etadigan "Tashkent City" ayollar velosport klubi Avstraliyaga yo'l oldi

Avvalroq, O'zbekiston ayollar velosport terma jamoasining asosini tashkil etuvchi "Tashkent City" velosport klubi shosse yo'nalishida Jahon kubogida ishtirok etish huquqini qo'lga kiritgani haqida xabar bergan edik.

Jamoamiz 2024 yilgi Jahon kubogining ilk bosqichi bo'lmish "Santos Tour Down Under Women’s World Tour" turnirida ishtirok etish maqsadida Avstraliyaga yo'l oldi. Ayollar o'rtasida jami 16 ta klub ishtirok etadigan bellashuvlar 12-14 yanvar kunlari tashkil etiladi.

Unda O'zbekistonning "Tashkent City" klubi quyidagi tarkibda ishtirok etadi: Olga Zabelinskaya, Yanina Kuskova, Madina Qahhorova, Margarita Misyurina, Sofiya Karimova, Nafosat Kozieva.

Ayollar o'rtasidagi bellashuvlar uch bosqichdan iborat bo'ladi. Dastlabki kunda velosportchilar 93,9 km, ikkinchi kunda 104,2 km, yakuniy bosqichda esa 93,4 km masofani bosib o'tishlari talab etiladi. Bu Jahon kubogi bosqichlaridagi eng qiyin musobaqa hisoblanadi.

Jamoamiz turnirda quyidagi jersida harakat qiladi:

Eslatib o'tamiz, "Tashkent City" klubiga 2022 yilda asos solingan. Musobaqa jarayonlarini Olamsport.com saytida kuzatib boring!