Turkiya Gran-Prisini bitta medal va 490 reyting ochkosi bilan yakunladik

Uch kun davom etgan musobaqada sayyoramizning 5 qitasi 78 davlatidan jami 533 nafar ishtirokchi Gran-Pri medallari hamda Tokio-2020 Olimpiadasining muhim reyting ochkolari uchun tatamiga chiqishdi. 

Malumot uchun, Gran-Pri g'oliblari o'z hisoblariga oltin medaldan tashqari 700 reyting ochkosini qo'shib qo'yishdi. Finalchilar 490 ochkoga bo'lishdi. Bronza medal egalari 350 ochkoga ega chiqishdi. Beshinchi o'ringa 252, ettinchi o'rindan joy olgan dzyudochilarga 182 ochko tegdi. Quyiga qarab qolgan o'rin egalari mos ravishda 112, 84, 70 va 10 ochkoga ega bo'lishdi. SHunchaki ishtirok uchun 6 ochko taqdim etildi. 

Antaliya tatamilarida o'z imkoniyatini sinovdan o'tkazgan hamyurtlarimizdan birgina Kemran Nurillaev O'zbekistonga kumush medal bilan qaytadigan bo'ldi. U musobaqaning ikkinchi kuni terma jamoamiz hisobiga ana shu yagona medalni taqdim etdi. -60 kg vazn toifasida yurtimiz sharafini himoya qilgan Kemran finalga qadar mag'lubiyatsiz etib bordi. Nurillaev oltin medal uchun kechgan bahsda qozog'istonlik Yeldos Smetovga imkoniyatni boy berib qo'ydi.