Uch erkin kurashchimiz Osiyo chempionatining bronza medali uchun gilamga chiqadi

Musobaqani erkin kurash ustalari boshlab berishdi. Bugun 5 nafar kurashchimiz medallar uchun kurashga kirishdi. Ulardan 3 nafari kechki dasturda bronza medali uchun gilamga chiqadigan bo'ldi. Qolgan 2 kurashchimiz saralash bahslarida mag'lubiyatga uchrab, Osiyo chempionatidagi ishtiroklarini yakunlashdi.  

-57 kg vazndagi Nodirbek Jumanazarov ilk davrda turkmanistonlik Kabe Matjanovdan ustun keldi. Lekin 1/4 finalda qozog'istonlik Meyrambek Kartbayga yutqazib qo'ydi. -65 kg vazndagi vakilimiz, Rio-2016 Olimpiadasi ishtirokchisi Abbos Rahmonov pokistonlik Muhammad Abdulloh, turkmanistonlik Jelaletdin Seyidovdan ustun keldi. Ammo 1/2 finalda eronlik Rahmon Musa Amouzadhaliliga imkoniyatni boy berdi. Endi u kechki dasturda Osiyo chempionatining bronza medali uchun qirg'izistonlik Ulukbek Joldoshbekovga qarshi bahs olib boradi.   

-70 kg vaznda yurtimiz sharafini himoya qilayotgan Begijon Qo'ldoshev ilk davrada mo'g'ulistonlik CHinzorig Sermani engdi. CHorak finalda esa yaponiyalik Yoshinosuke Aoyagiga yutqazdi. Begijon endi bronza medali uchun hindistonlik Abhimanyuga qarshi gilamga chiqadi. 

-79 kg vaznda kurashayotgan Asomiddin Hasanov ham kechki dasturda bronza medali uchun bahs olib boradigan bo'ldi. U 1/4 finalda koreyalik Bumgue Seodan ustun keldi. Yarim finalda esa mo'g'ulistonlik Byambadorj Enxbayarga qarshilik ko'rsata olmadi - 0:11. Hasanov kechki dasturda bronza medali uchun qozog'istonlik Azamat Omurjanovga qarshi bahs olib boradi.  

-97 kg vazndagi polvonimiz Maxsud Veysalov ilk uchrashuvidayoq qozog'istonlik Rizabek Aitmuxanga yutqazib qo'ydi. Bronza medali yo'lidagi o'tish bellashuvida esa qirg'izistonlik Andrey Aronovga ham imkoniyatni boy berdi va Osiyo chempionatidagi ishtirokini medalsiz yakunladi. 

Bronza medali uchun: 

-65 kg: Abbos Rahmonov - Ulukbek Joldoshbekov (Qirg'iz Respublikasi)

-70 kg: Begijon Qo'ldoshev - Abhimanyu (Hindiston)

-79 kg: Asomiddin Hasanov - Azamat Omurjanov (Qozog'iston)