Uch karra Olimpiya o'yinlari sovrindori Rishod Sobirovni tabriklaymiz!

Bugun O'zbekiston dzyudosi va sporti tarixidan joy olishga muvaffaq bo'lgan, Olimpiya o'yinlarining uch karra bronza medali sovrindori, ikki karra jahon chempioni, Osiyo chempioni, "O'zbekiston Respublikasida xizmat ko'rsatgan sportchi", "O'zbekiston iftixori" faxriy unvoni sohibi, "El-yurt hurmati" ordeni egasi Rishod Sobirov o'z tavallud ayyomini nishonlayapti. 

Rishod Rashidovich Sobirov 1986 yil 11 sentyabr kuni Buxoro viloyatining Jondor tumani, Burbog'i qishlog'ida tug'ilgan. Dzyudo bilan 11 yoshida Rustam To'raev qo'l ostida shug'ullanishni boshlagan. Xalqaro musobaqalarga murabbiylar Furqat Soliev va Boris Grigorev qo'l ostida tayyorgarlik ko'rgan hamda ishtirok etgan.

Rishod ilk xalqaro miqyosdagi sovrinini 2006 yilda qo'lga kiritgan. O'shanda qahramonimiz Xitoy Taypeyida bo'lib o'tgan yoshlar o'rtasidagi Osiyo chempionatida birinchi o'rinni egallagan. Oradan bir yil o'tib esa u kattalar o'rtasidagi Osiyo chempionatida finalgacha etib borgan va kumush medal sohibiga aylangan.

2008 yilda O'zbekiston chempioni bo'lganidan keyin mamlakat terma jamoasi tarkibidan joy oladi va Olimpiada yo'llanmasini qo'lga kiritadi. Pekinda bo'lib o'tgan Olimpiya o'yinlarida 60 kg gacha bo'lgan vazn toifasida u bronza medali sohibiga aylangan.

2010 yilda Rishod Sobirov Tokioda bo'lib o'tgan jahon chempionatida g'oliblikni qo'lga kiritadi. Oradan bir yil o'tib, Parijdagi jahon chempionatida bu muvaffaqiyatini yana takrorlaydi.

2012 yil Londonda bo'lib o'tgan Olimpiadada dzyudochimiz yarim finalgacha etib borgan. Biroq yakunda yana bronza medali bilan kifoyalanishga majbur bo'lgan.

2016 yili Braziliyada bo'lib o'tgan Rio Olimpiadasida u yana bronza medaliga ega chiqadi va uchta Olimpiya o'yinlarida medal qo'lga kiritgan kam sonli dzyudochilardan biriga aylanib oladi.

Professional sportdagi faoliyatini yakunlaganidan so'ng Rishod Sobirov Toshkentda o'zining dzyudo maktabini ochdi. "Dinamo" sport majmuasida faoliyati davom etayotgan dzyudo maktabida yangi Rishod Sobirovlar kamol topmoqda. 

Fursatdan foydalanib, Rishod Sobirovni bugungi unutilmas kun munosabati bilan chin qalbdan muborakbod etamiz.  

Sovrinlari:

Olimpiada: 3 ta bronza

Jahon chempionati: 2 ta oltin, 1 ta bronza

Jahon kubogi/Gran-Pri/Ulkan toj: 10 ta oltin, 4 ta kumush, 1 ta bronza

Osiyo chempionati: 1 ta oltin, 1 ta kumush, 2 ta bronza

Yoshlar o'rtasidagi Osiyo chempionati: 1 ta oltin

Harbiy xizmatchi

Mukofotlari:

Xalqaro toifadagi sport ustasi (2003)

"O'zbekiston Respublikasida xizmat ko'rsatgan sportchi" faxriy unvoni (2008)

"O'zbekiston Respublikasi Mustaqilligiga 20 yil" esdalik nishoni sohibi (2011)

"O'zbekiston iftixori" faxriy unvoni sohibi (2012)

"El-yurt hurmati" ordeni sohibi (2016)