UFC Fight Night 240 turnirining markaziy jangi saqlab qolindi

Oqshomning markaziy jangi o'rta vazn toifasida italiyalik Marvin Vettori hamda Brendan Allen o'rtasida o'tkazilishi kerak edi. Ammo Vettori mashg'ulotda jarohat olgani uchun safdan chiqqandi. Promoushen rahbarlari qisqamuddatda markaziy jangni saqlab qolishga muvaffaq bo'lishdi. 

UFC o'rta vazn toifasi reytingida 14-o'rinni egallab turgan Kris Kertis italiyalik jangchining o'rnini egallashga rozilik bergan. UFC Fight Night 240 turnirining yangilangan markaziy jangi promoushen matbuot xizmati tomonidan rasman elon qilindi.

Etiborlisi, ushbu jang revansh maqomida bo'ladi. Amerikaliklarning o'zaro ilk jangi 2021 yilning dekabr oyida o'tkazilgan bo'lib, o'shanda Kertis Allenni ikkinchi raundda nokautga uchratgandi. Brendan hozircha oxirgisi bo'lib turgan o'sha mag'lubiyat uchun revansh olishga urinib ko'radi. Allen o'sha mag'lubiyatdan keyin ketma-ket 6 ta jangda g'alaba qozondi.