UFC ikki haftagina o'z so'zida turdi

Uayt ikki hafta oldin jangchilarga o'z davlati bayrog'i va ramzlari bilan oktagonga chiqish uchun ruxsat bergandi. Ammo oradan hech qancha vaqt o'tmay, tashkilot UFC 294 turniri ishtirokchilari uchun ramzlar, xususan bayroqdan foydalanmaslikka norasmiy tarzda buyruq berdi. 

Bu haqda Buyuk Britaniya sharafini himoya qilib kelayotgan, asli dog'istonlik va bugun "Etihad Arena"da oktagonga ko'tariladigan Muhammad Mokaev xabar berdi.

"UFC 294 turnirida hech qanday bayroqlar bo'lmaydi", - deb yozgan Mokaev o'zining ijtimoiy tarmoqdagi sahifalarida.

SHuningdek, bu malumotni "Match TV" kanaliga bergan intervyusida rossiyalik Viktoriya Dudakovaning murabbiyi Gasanali Gasanaliev ham tasdiqlagan.

"Bizga bu safar bayroq bilan chiqmasligimizni aytishdi", - dedi rossiyalik mutaxassis.

Bir hafta avvalgi UFC turnirida Irina Alekseeva Rossiya, braziliyalik Mishel Pereyra esa kutilmaganda Isroil bayrog'i bilan oktagonga chiqqan edi. Pereyraning bu xatti-harakati Falastinga qayg'urayotganlar tomonidan jiddiy etirozlarga sabab bo'lgandi. 

Malumotlarga qaraganda, aynan braziliyalikning bu ishi UFC rahbarlarining bayroq masalasidagi erkinlikka qayta taqiq qo'yilishiga sabab bo'lgan. Bu cheklov faqat UFC 294 turniri uchun bo'ladimi yoki yo'q, hozircha bu malum emas.