UFCda muammo: jangchilarga ommaviy ravishda jangni sotish taklif qilinmoqda

Dunyodagi eng kuchli MMA ligasi jiddiy muammoga duch kelgan ko'rinadi, chunki ko'plab sportchilarga jangni atayin yutqazish bo'yicha pulli takliflar kelmoqda.

Bu haqda mashhur sport sharhlovchisi Ariel Xelvani o'z podkastida malum qildi. U bu fikrlarni o'tgan haftada bo'lib o'tgan Ayzek Dulgarian va Yadier Del Valle o'rtasidagi jang ortidan bildirdi.

"Men bir nechta odamlar bilan gaplashdim, ular menga xuddi shunday takliflar bo'lganini aytdi. Ulardan "jangni atayin yutqazib berishga tayyormisiz" deb so'rashgan. Bu UFC uchun katta muammo. Biz ilgari ham bir necha marta tushunarsiz tugagan janglarni ko'rganmiz — ularni boshqacha izohlab bo'lmaydi. 

Bu, odatda, ozgina gonorar oladigan jangchilar qatnashadigan janglarda bo'ladi, ularga esa katta miqdorda pul taklif etiladi. Ular uchun bu haqiqiy imkoniyat bo'lib ko'rinadi", – dedi Xelvani.

Uning so'zlariga ko'ra, ayrim holatlarda referi va hakamlar ham shubha ostida bo'lishi mumkin:

"Bu masala FBR tergovi uchun mavzudir. Menimcha, bu haqiqatan ham shunday, va bu mutlaqo aqlbovar qilmas holat", – deya qo'shimcha qildi u.

Bundan tashqari, sobiq UFC jangchisi Lendo Vannata unga jangni "sotish" bo'yicha etti marta murojaat bo'lganini aytdi. Vins Morales esa o'z navbatida unga taklif etilgan miqdorni ham oshkor qildi — 70 ming dollar.

Yana bir manba — muhbir Garri Makning malum qilishicha, bu yilning o'zida 100 dan ortiq UFC janglari FBR etiboriga tushgan, ularning ayrimlarida kelishilgan natija bo'lishi mumkinligi taxmin qilinmoqda. SHuningdek, hukumat referi Jeyson Hercog ishtirok etgan janglarni qayta tekshirish niyatida ekani ham aytilgan, ammo bu malumot hozircha rasman tasdiqlanmagan.