18 avg 08:00
Yangiliklar
Ular JCHga boradilar #2: Jasurbek Latipov
1991 yilda tug'ilgan Jasurbek uchun ushbu jahon chempionati birinchisi emas. Engil vaznli tezkor bokschi hisoblanadigan Jasurbek bungacha ikki marotaba jahon birinchiligida ishtirok etgan.
2011 yilda Bokuda bo'lib o'tgan jahon chempionatida bronza medalini qo'lga kiritgan Andijon boks maktabi tarbiyalanuvchisi oradan ikki yil o'tib Almatida bo'lgan dunyo birinchiligida finalgacha etib borgan va o'shanda Misha Aloyanga imkoniyatni boy berib qo'ygandi. Orada 2012 yil Londonda bo'lib o'tgan Olimpiadada chorak finalgacha etib borib, mog'ulistonlik raqibga yutqazib qo'ygandi.
SHundan so'ng ushbu vazn toifasida terma jamoa yig'inlariga SHahobiddin Zoirov jalb etila boshlandi. Ikki yil oldin Doxada bo'lib o'tgan jahon chempionatida SHahobiddin ilk jangidayoq imkoniyatni boy berib qo'ygandi. Rio Olimpiadasida esa Zoirov oltin medalni qo'lga kiritgani hali yodingizdan chiqmagan bo'lsa kerak.
Ushbu vazn toifasida Jazoir vakili Muhammad Flissi, kubalik Yosbani Veytia, qolaversa, irlandiyalik Brendan Irvayn, mezbon bokschi Xamza Touba va qozog'istonlik Azamat Issakulov Jasurbekning asosiy raqibi hisoblanadi. O'z o'rnida shuni takidlab o'tishimiz lozimki, Latipov Gavanada "WSB" janglari doirasida "Uzbek Tigers" safida Yosbani Veytiaga mag'lub bo'lgandi.
SHuningdek, Toshkentda bo'lib o'tgan Osiyo chempionatida u Azamat Issakulovni yarim finalda mag'lubiyatga uchratdi. Demak, Issakulov o'sha mag'lubiyat uchun qasos olishga harakat qilishi aniq.
Jasurbek Gamburg turniriga yo'llanmani Toshkentda bo'lib o'tgan Osiyo chempionatida qo'lga kiritgan. Vakilimiz o'sha turnirda barcha raqiblarini mag'lubiyatga uchratib, oltin medalni O'zbekiston terma jamoasi hisobiga qo'shib qo'ygandi.
Nisbatan sovuqqon va og'ir bosiq Jasurbek uchun ushbu JCH uchinchisi hisoblanadi. Birinchi va ikkinchi jahon chempionatlarida mos ravishda bronza va kumush medallarni qo'lga kiritgan sportchimiz uchinchi urinishda navbat qaysi medalga kelganini yaxshigina tushunib turibdi. Ammo, bu oson ish emas. Latipov ushbu jahon chempionatida kamida yarim finalgacha etib bora olishi kerak.
Aziz To'xtamurodov
Fikrlar