Ular JCHga boradilar #3: Murodjon Ahmadaliev

1994 yilda tavallud topgan namanganlik bokschimiz Murodjon Ahmadaliev Gamburgga favorit sifatida boradi. Rio Olimpiadasi qahramonlaridan biri hisoblanadigan "KAKA" bungacha 2015 yilda Dohada bo'lib o'tgan jahon chempionatida qatnashishga ulgurgan.

Qitamizda bo'lib o'tgan jahon birinchiligida Murodjon finalgacha etib borgan va yakunda irlandiyalik Maykl Konlanga HAKAMLAR sabab imkoniyatni boy berib qo'ygandi. Vaholanki, o'sha final jangida bokschimiz raqibini nokdaun holatiga tushirishga ham muvaffaq bo'lgandi. Yakunda sportchimiz JCH kumush medali bilan kifoyalanishga majbur bo'lgandi. O'sha jangdan ancha vaqt o'tganidan keyin Konlan o'zi jang qilgan eng kuchli bokschilar qatorida Ahmadalievni ham aytib o'tgandi.



Osiyo chempionatlarida ikki marotaba ishtirok etgan Murodjon 2015 yilda Bangkokda kumush medalini qo'lga kiritgandi. O'shanda u finalda mezbonlar vakili CHatchai Butdega yutqazgandi. Huddi o'sha yili bo'lib o'tgan jahon chempionatida vakilimiz chorak finalda kim aslida kim ekanligini ko'rsatib qo'ygan va 3:0 hisobida g'alaba qozongan.

Rio Olimpiadasida esa u principial raqiblaridan biri, qozog'istonlik Qayrat Eralievni ishonchli tarzda mag'lubiyatga uchratgandi. Ikkinchi jangida argentinalik raqibini texnik nokaut qilgan Ahmadaliev final ostonasida kubalik ikki karra Olimpiada chempioni Robeysi Ramiresga imkoniyatni boy berib, yakunda bronza medallari bilan kifoyalangan.

Toshkentdagi Osiyo chempionatida esa u raqiblarini ketma-ket nokautlar hisobiga mag'lubiyatga uchratib, finalgacha etib borgan. Hal qiluvchi jangda esa xitoylik Jang Jiaveidan ustun kelib, qita chempionligini qo'lga kiritgandi. Jang yaqinlashib kelayotgan JCHda Murodjondan revansh olishga urinib ko'rishi aniq.



Bundan tashqari -56 kg vazn toifasida bokschimizga kubalik Xaver Ibanez (Murodjon WSB doirasida Samarqandda bo'lib o'tgan jangda uni 2:1 hisobida mag'lubiyatga uchratgan), qozog'istonlik Qayrat Eraliev (Rio Olimpiadasi va JCH-2015da mag'lubiyatga uchratgan), Evropa chempionati sovrindorlari Piter MakGrail (Angliya), Mikola Butsenko (Ukraina) lar asosiy raqiblar hisoblanishadi.

Juda kuchli zarbaga ega bo'lgan bokschimiz jahon chempionati yo'llanmasini shu yil Toshkentda bo'lib o'tgan Osiyo chempionatida qo'lga kiritgan. Sportchimiz o'sha turnirda barcha raqiblarini mag'lubiyatga uchratib, oltin medalni qo'lga kiritgandi.



Ilk jahon chempionatidayoq finalgacha etib borgan vakilimiz bu safar kamida shu natijasini takrorlashi lozim. O'zbek boks muxlislari Murodjon Ahmadalievdan oltin medal kutmoqdalar desak yanglishmagan bo'lamiz.


Aziz To'xtamurodov