Ular JCHga boradilar #4: Elnur Abduraimov

1994 yilda tavallud topgan Elnur Abduraimov uchun ushbu jahon chempionati ikkinchisi hisoblanadi. O'z vazn toifasida favoritlardan biri hisoblanadigan Elnur 2015 yilda Dohada bo'lib o'tgan dunyo birinchiligida ishtirok etgan va bronza medali sohibiga aylangandi.

Abduraimov 2015 yilgi jahon chempionatidagi ishtiroki orqali Rio Olimpiadasiga yo'l olgandi. Ammo, Elnurdan tashqari boshqa bir bokschimiz Xurshid Tojiboev WSB janglari orqali ham Braziliya Olimpiadasiga yo'llanmani qo'lga kiritgandi. Yakunda, terma jamoa murabbiylar shtabi Tojiboevni Rioga olib ketgandi.

Malumot uchun, shuni aytib o'tishimiz lozimki, Elnur Abduraimov Dohada Rio Olimpiadasi licenziyasi uchun bo'lib o'tgan jangda braziliyalik Robson Konseysaoni mag'lubiyatga uchratgan. Konseysao Rioda bo'lib o'tgan Olimpiadada oltin medal sohibiga aylangandi. U ushbu yo'lda Olimpiada chorak finalida Tojiboevni mag'lubiyatga uchratgandi.



Elnurning 2015 yilgi JCHdagi ishtiroki haqida gapiradigan bo'lsak, u janglarda Jazoir, Yangi Zelandiya va Mo'g'uliston vakillarini mag'lubiyatga uchratib, yarim finalga chiqqandi. Yarim finalda esa uch karra jahon chempioni, kubalik Lazaro Alvaresga mag'lub bo'lgandi.

Keyinchalik sportchimiz o'z vazn toifasini -64 kg ga o'zgartirdi. Elnur ushbu vaznda O'zbekiston chempioniga aylandi. O'zbekiston chempionati finalida Iqboljon Xoldorovni mag'lubiyatga uchratgan.
WSB janglarida ham Abduraimov -64 kg vazn toifasida qatnashdi.

SHu yilning may oyiga kelib u yana o'zining qadrdon vazniga -60 ga qaytadi. Ushbu vazn toifasida Toshkentdagi Osiyo chempionatida ishtirok etadi va oltin medal sohibiga aylanadi. Gamburgdagi jahon chempionatiga yo'llanmani Elnur ham boshqa bokschilarimiz singari poytaxtimizda bo'lib o'tgan qita birinchilida qo'lga kiritgandi.



Ushbu vazn toifasida Elnurning asosiy raqiblari so'zsiz kubalik Lazaro Alvares hisoblanadi. Bokschimiz Alvaresga uch marotaba yutqazgan. Janglardan biri JCH yarim finali doirasida bo'lsa, yana ikkita jangda u WSB musobaqasida to'qnash kelgan. Undan tashqari mazkur vazn toifasida Elnurga xitoylik Jun SHan, hindistonlik SHiva Tapa (OCH-2017 finalida aynan uni mag'lubiyatga uchratgandi), rossiyalik Gabil Mamedov va ukrainalik Yuriy SHestaklar muammo tug'dirishi kutilmoqda.

O'zbek boksi muxlislari jahon chempionatida Elnur Abduraimovdan medal kutmoqdalar. Bokschimiz Germaniyada kamida yarim finalga etib borishi shart!


Aziz To'xtamurodov