Ular JCHga boradilar #6: SHahram G'iyosov

Buxoro boks maktabi tarbiyalanuvchisi hisoblanadigan 24 yoshli SHahram G'iyosov ilk marotaba jahon chempionatida qatnashadi. Albatta jahon chempionatidagi debyut SHahramning tajribasiz ekanligini bildirmaydi. G'iyosov O'zbekistonda Rio Olimpiadasi qahramonlaridan biri sifatida etirof etiladi.

SHahram 2015 yilda O'zbekiston chempionligini qo'lga kiritgan. 2016 yilda esa licenzion musobaqada ishtirok etib, Rioda bo'lib o'tadigan Olimpiadaga yo'llanmani qo'lga kiritgan. Aynan o'sha yili u "Uzbek tigers" safida WSB janglarida ishtirok etgan va jamoa bilan yarim finalga qadar etib borgandi.

2016 yilda Braziliyada bo'lib o'tgan Olimpiadadagi muvaffaqiyatli ishtirok SHahramga shuhrat olib keldi. Bokschimizning g'alabani "Ronalducha uslub"da nishonlashi esa chet el OAVlari diqqat markazida bo'ldi. O'z jangini shouga aylantirib yuboradigan SHahram G'iyosov Rio Olimpiadasida finalgacha etib bordi. Bokschi bu yo'lda jahon chempioni Muhammad Rabiini, shuningdek Olimpiada chempioni Roniel Iglesiasni mag'lubiyatga uchratgandi. Yakunda qozog'istonlik Daniyar Eliussinovga imkoniyat boy berilgan.

G'iyosov jahon chempionati yo'llanmasini Toshkentda bo'lib o'tgan Osiyo chempionatida naqd qilib olgan. O'shanda u barcha raqiblaridan ustun kelib, Osiyo chempioniga aylangan.

Ushbu vazn toifasida SHahram G'iyosovga Roniel Iglesias (Kuba), Pat MakKormak (Angliya), Abass Baraou (Germaniya), Abilxon Jussupov (Qozog'iston) kabi bokschilar raqobat tug'dirishi kutilmoqda.



Fikrimcha, SHahram G'iyosov mazkur turnirda jahon chempioni unvoni uchun bemalol kurasha oladi. Muxlislar bokschidan oltin medal kutmoqdalar. U jahon chempionligini qo'lga kiritganidan so'ng yana bir marotaba Olimpiada chempionligi uchun kurashib ko'rishi lozim. Ana shundan so'ng SHahram professional boksga o'tishi lozim. CHunki, professional boksda unga o'xshagan bokschilar o'z yo'lini topib keta oladilar.

Aziz To'xtamurodov