Ular JCHga boradilar #7: Isroil Madrimov

-75 kg vazn toifasida bugungi kunda O'zbekistonning birinchi raqamli bokschisiga aylanib olgan Isroil Madrimov 1995 yilda Xorazmda tavallud topgan.

Gamburg turniri Madrimov uchun ilk jahon chempionati hisoblanadi. Isroilgacha ushbu vazn toifasida Bektemir Meliqo'ziev xalqaro turnirlarda O'zbekiston sharafini himoya qilardi.

Madrimov 2015 yilgacha -69 kg vazn toifasida janglar o'tkazardi. 2016 yildan boshlab vaznini o'zgartiradi va -75kg vazn toifasida O'zbekiston chempioniga aylanadi. O'sha yilning o'zida Rossiyadagi xalqaro turnir g'olibiga aylangan Isroil 2017 yildan boshlab WSB janglarida "Uzbek Tigers" sharafini himoya qila boshlaydi.



Ko'z tegmasin, Madrimov 2017 yilgi mavsumda mag'lubiyat nimaligini bilmayapti. WSB janglarida Rossiya, Qozog'iston, Kuba vakillari mag'lubiyatga uchratildi. Isroil mag'lubiyatga uchratgan Arlen Lopes Rio 2016 Olimpiadasi finalida Bektemir Meliqo'zievni mag'lubiyatga uchratib, Olimpiada chempioniga aylangandi. Sportchi orada Tailandda bo'lib o'tgan xalqaro turnir chempioniga aylandi.

Bundan tashqari Toshkentda bo'lib o'tgan Osiyo chempionati ham sportchimiz uchun juda muvaffaqiyatli o'tdi. Qita birinchiligida raqibini soniyalar ichida nokautga uchratgan jangini eslaysizmi? Yakunda bokschimiz barcha raqiblarini mag'lubiyatga uchratib Osiyo chempioniga aylangandi. Aynan o'sha g'oliblik, Madrimovga Germaniyada bo'lib o'tadigan jahon chempionatida ishtirok etish imkoniyatini yaratib bergan.



Ushbu vazn toifasida Isroilga albatta kubalik Arlen Lopes, kolumbiyalik Luis Palasios, qozog'istonlik Abilxon Amankul, ukrainalik Oleksandr Kijniyaklar yaxshigina muammo tug'dirishi kutilmoqda.

Mazkur jahon chempionatida o'zbek boksi muxlislari Isroil Madrimovdan oltin medal kutmoqdalar. Umid qilamizki, bokschimiz Germaniya arenalarida ham o'z saltolari bilan bizni xursand qiladi.


Aziz To'xtamurodov