Ular JCHga boradilar #8: Bektemir Meliqo'ziev

1996 yilda Farg'ona viloyatida tavallud topgan Bektemir Meliqo'ziev O'zbekistonning eng ishongan bokschilaridan biri hisoblanadi. Gamburgdagi turnir Bektemir uchun ilk jahon chempionati emas. U 19 yoshida Dohada bo'lib o'tgan jahon chempionatida finalgacha etib borib, kumush medal sohibiga aylangandi. Yaqinlashib kelayotgan turnirda Bektemirdan ushbu kumushni oltinga aylantirish talab qilinadi.

2014 yilda bo'lib o'tgan Nankin o'smirlar Olimpiadasida chempionlikni qo'lga kiritgan Bektemir, keyingi yili 19 yoshida O'zbekiston chempionatida kattalar o'rtasida tengsiz deb topiladi. Aynan o'sha 2015 yilda bokschi kattalar o'rtasidagi Osiyo chempionatida -75kg vazn toifasida oltin medal sohibiga aylanadi. Keyinchalik, Qatarda bo'lib o'tgan jahon chempionatida raqiblarini mag'lubiyatga uchratib, finalgacha etib boradi. Finalda esa kubalik tajribali Arlen Lopesga imkoniyatni boy berib qo'yadi.

2016 yilgi Rio Olimpiadasida ham Bektemir muvaffaqiyatli ishtirok etadi va finalgacha etib boradi. Finalda esa yana o'sha Arlen Lopes bokschimizni oltin medaldan mosuvo qiladi va yakunda Meliqo'ziev Olimpiya o'yinlarining kumush medali bilan kifoyalanadi. Xar holda 20 yoshli yigitcha uchun Olimpiada finaliga chiqish yomon natija emas, nima dedingiz?



Rio Olimpiadasidan so'ng Bektemir Meliqo'ziev o'z vazn toifasini o'zgartiradi. Endi -81 kg vazn toifasidagi janglarda qatnashadigan bokschi WSB janglarida "Uzbek Tigers" uchun muhim bo'lgan ochkolarni taqdim etadi.

May oyida Toshkentda bo'lib o'tgan Osiyo chempionatida esa bokschi barcha raqiblarini mag'lubiyatga uchratib, ketma-ket ikkinchi marotaba Osiyo chempioniga aylanadi. O'sha turnirda Bektemir to'rtta jang o'tkazib, ikkitasida raqiblarini nokautga uchratgan. Yana ikkita jangida esa to'liq ustunlik bilan 5:0 hisobidagi g'alabalarni qo'lga kiritgandi. Aynan o'sha chempionlik bokschi uchun Gamburgda bo'lib o'tadigan jahon chempionatida ishtirok etish imkoniyatini taqdim etgan.

-81 kg vazn toifasida Bektemir Meliqo'zievga kubalik Xulio Sezar La Kruz halal berib qolishi mumkin. Bokschimiz "Uzbek Tigers" safida unga imkoniyatni boy berib qo'ygandi. Ushbu JCHda unda revansh olish imkoniyati bo'ladi. SHuningdek, irlandiyalik Jozef Uord, rossiyalik Muslim Gajimagomedovlar biroz muammo tug'dirishi kutilmoqda.



JCH va Olimpiada finaliga chiqib, kumush medalni qo'lga kiritgan bokschimizning navbatdagi natijasi oltin bo'lishi lozim. U bir insonga Tokio Olimpiadasida oltin medal qo'lga kiritishni vada qilib qo'ygan. Tokio yo'lida esa Gamburg va Sochi turnirlarida qo'lga kiritilgan oltin medallar halal bermagan bo'lardi.


Aziz To'xtamurodov