Umar Nurmagomedov raqamlangan turnirda jang qiladi

Kichik Nurmagomedov 25 oktyabr kuni BAA poytaxti Abu-Dabi shahrida o'tkaziladigan raqamlangan UFC 321 turnirida oktagonga chiqadi. Bu haqda divizion reytingida ikkinchi o'rinni egallab turgan Umarning o'zi Kaspiyskda o'tgan matbuot anjumanida xabar bergan. 

"Ha, bu to'g'ri malumot. Menejerim menga qo'ng'iroq qilib, UFC rahbarlari Abu-Dabida jang qilishimni istayotganini aytdi. Biz jamoamiz bilan kelishib, bu taklifga rozilik berdik. Boisi, o'sha paytda butun jamoamiz Dubayda bo'ladi. Lokaciya qulay va men Abu-Dabida jang qilaman. Aslida men besh raundlik turnirning asosiy jangida oktagonga chiqishni rejalashtirayotgandim. UFC`dagilar shuni istashayotgan ekan, mayli bu chorlovni qabul qildim", – dedi Nurmagomedov.

SHuningdek, Umar Abu-Dabida g'alaba qozongan taqdirda yana chempionlik jangi uchun imkoniyat berilishini ham qo'shimcha qildi. 

"Hammasi yana UFC`ga bog'liq. Bir o'zim hech narsani hal qila olmayman. Davogarlar orasida g'alabali seriya bilan kelayotgan Pyotr Yan ham bor. Menimcha, UFC aynan Yanga chempionlik imkoniyatini taqdim etadi. Keyin mening Abu-Dabida qanday natija ko'rsatishimga ham ko'p narsa bog'liq. Agar yorqin jang ko'rsatib g'alaba qozonsam, meni kamar uchun davogar deb elon qilishlari ham mumkin. Men bunga tayyorman", – dedi Umar Nurmagomedov.

Umar Nurmagomedov Abu-Dabidagi turnirda kimga qarshi jang o'tkazishini ochiqlamadi. Katta ehtimol bilan uning raqibi divizion reytingida sakkizinchi o'rinni egallab turgan amerikalik Mario Bautista bo'ladi.