Umid Ahmadjonov engilmas bokschimiz Sanjarbek Rahmonov bilan uchrashdi

Bokschimizni MOQ Prezidenti Umid Ahmadjonov qabul qildi.

Suhbat davomida Umid Ahmadjonov Sanjar Rahmonovning rejalari bilan qiziqdi. Bundan buyon Milliy olimpiya qo'mitasi sportchi uchun kerakli barcha shart-sharoitlarni yaratib berishga tayyor ekanligini malum qildi.

"Futbolda shunday tizim bor. O'zbekistonlik sportchi xorij klubida o'ynashiga qaramay, terma jamoa miqyosidagi o'yinlarda bizga yordam berishi mumkin. Istaymizki, bokschilarimiz promouterlar bilan shartnoma tuzishidan oldin nufuzli xalqaro turnirlarda O'zbekiston sharafini himoya qilish bandini ham kiritsalar. Bunday holatda ularda ham amaliyot bo'ladi, qolaversa O'zbekiston boks terma jamoasida raqobat kuchayadi. Bugungi kunda AIBA qoidalarga o'zgartirish kiritgan. Unga ko'ra, professional bokschilar Olimpiya va Osiyo o'yinlarida o'z terma jamoalariga yordam berishlari mumkin. Faqat, buning uchun bokschilar promouterlar bilan tuziladigan shartnomada ushbu bandni kiritishlari lozim bo'ladi", - dedi Milliy olimpiya qo'mitasi rahbari.

O'z navbatida bokschimiz ham samimiy qabul uchun MOQ rahbariga minnatdorchilik bildirdi. Jahon arenalarida O'zbekiston sharafini munosib himoya qilib, yurtimiz bayrog'ini ko'klarga ko'tarishga vada berdi.

Malumot uchun, Sanjarbek Rahmonov ayni paytda afsonaviy bokschi Floyd Meyvezerga qarashli promouterlik kompaniyasida faoliyat olib bormoqda. U professional ringda 11ta jang o'tkazgan va shularning 10tasida g'alaba qozongan. Bitta jangda esa durang qayd etgan. U janglarning 5tasida nokaut evaziga raqiblarini mag'lub etganini alohida qayd etib o'tishimiz lozim.