UWW prezidenti yunon-rum kurashchilarimiz bilan uchrashdi + FOTO

Bu jamoalarning barchasi o'tgan hafta poytaxt Zagreb shahrida o'tkazilgan Gran-Pri turnirida ishtirok etgandi. 

Tabiiyki, qatnashchi davlatlar orasida yunon-rum kurashi bo'yicha O'zbekiston terma jamoasi ham bor. Ravshan Ro'ziqulov murabbiyligidagi kurashchilarimiz Zagreb turnirida 2 ta oltin, 1 tadan kumush va bronza medallarini qo'lga kiritishgandi. Bir yillik tanaffusdan so'ng nihoyat xalqaro turnirda ishtirok etgan "klassiklar"imiz uchun bu yaxshi natija. 

Etiborlisi, kecha Birlashgan kurash dunyosi (UWW) prezidenti Nenad Lalovich Porechda o'tkazilayotgan xalqaro o'quv-mashg'ulot yig'iniga tashrif buyurdi va u erdagi kurashchilarning shug'ullanishi uchun yaratilgan sharoitlar bilan tanishdi. 

Tabiiyki, UWW rahbari kurashchilarimiz bilan ham ko'rishib, ular bilan muloqotga kirishdi. Lalovich O'zbekiston sport kurashchilarining xalqaro kurash oilasida tutgan o'rniga alohida urg'u qaratib, muvaffaqiyatlar Tokio Olimpiadasida ham bardavom bo'lishini tiladi. Samimiy o'tgan suhbat so'nggida Nenad Lalovich xalqaro o'quv-mashg'ulot yig'ini ishtirokchilari bilan esdalik uchun suratga tushdi.