Vazir sport talimi va ommaviy sport targ'ibotini yanada kuchaytirishga qaratilgan videoselektor o'tkazdi

Unda Vazirlik, Milliy Olimpiya qo'mitasi va Milliy Paralimpiya qo'mitasi rahbariyati va xodimlari, Respublika Oliy sport mahorati maktablari, viloyat va tumanlardagi sport boshqarmalarning mutasaddilari, Respublikadagi barcha BO'SM va IBO'SM vakillari ishtirok etishdi. 

Tadbir davomida kun tartibidan o'rin olgan barcha masalalar tanqidiy ruhda ko'rib chiqildi. O'z vazifasiga yuzaki yondashayotgan mutasaddilarga so'ngi ogohlantirish berildi.

A.Ikramov dastavval Olimpiya va Paralimpiya tayyorlash markazlariga qabul jarayonlarining ochiqlik va shaffoflik asosida o'tishini nazorat qilish, metodistlar malakasini oshirish masalasiga alohida to'xtaldi. Bu borada Xorazm viloyatidagi amaliy imtihon jarayonlarining YouTube ijtimoiy tarmog'ida jonli berib borilgani boshqa hududlarga misol tariqasida ko'rsatildi. 

Yig'ilishda kun tartibiga muvofiq, 2022/2023 o'quv yilidan boshlab sport maktablari faoliyatini yangi tizim asosida tashkil etish bo'yicha belgilangan vazifalar ijro holati hamda sport maktablari rahbar xodimlari hamda metodistlarining malakasi va masuliyatini oshirish masalalari, Sport tadbirlarining 2023 yilga mo'ljallangan kalendar rejasini shakllantirish, yil yakuniga qadar tizimni moliyalashtirish, jumladan xodimlarni rag'batlantirishni adolatli va shaffof tashkil etish hamda Sportni qo'llab-quvvatlash jamg'armasi faoliyatini tashkil etish masalalari ham ko'rib chiqildi.

SHuningdek, yig'ilishda 5 tashabbus Olimpiadasining ikkinchi bosqichini ham yuqori saviyada tashkil etish, unda aholi qamrovini ko'paytirish borasida takliflar o'rganib chiqildi. Hozirda birinchi bosqichda g'olib bo'lgan mahallalarga vork-out maydonlarini qurish jarayoni olib borilmoqda. Adham Ikramov bu kabi bunyodkorlik ishlari musobaqaning keyingi bosqichlarida boshqa mahalla vakillariga ham motivaciya berishini urg'uladi. 

Tadbir davomida ayrim hududlardagi sport maktablarining faoliyati tanqidiy ruhda ko'rib chiqildi. Lavozimiga noloyiq deb topilgan maktab direktorlari va mutaxassislar ishdan olinib, ularning o'rniga munosib nomzodlarni taklif qilish bo'yicha ko'rsatmalar berildi. 

Yakunda A.Ikramov barchani kirib kelayotgan O'zbekiston Respublikasi Mustaqilligining 31 yillik bayrami bilan qutlab, barcha xodimlar, qolaversa tizimning quyi tashkilotlari vakillariga yig'ilishda berilgan topshiriqlarni o'z vaqtida va sidqidildan bajarishni so'radi.