Vazirlikda Toshkent Gran-prisiga tayyogarlik muhokama qilindi

O'zbekiston jismoniy tarbiya va sport vazirligida ushbu nufuzli musobaqaga tayyorgarlik, katta sport tadbirini yuqori saviyada tashkil etish va o'tkazishga bag'ishlangan tashkiliy qo'mita yig'ilishi bo'lib o'tdi. Tadbirni O'zbekiston jismoniy tarbiya va sport vazirining birinchi o'rinbosari Oybek Kasimov olib bordi. 

“Bir necha yildan beri ananaviy tarzda o'tkazib kelinayotgan Toshkent Gran-prisiga ilk bor muhtasham, ko'p tarmoqli, jahon talablariga to'liq javob beruvchi “Humo” arena mezbonlik qiladi. Poytaxtimizga kelgan Xalqaro dzyudo federaciyasi (IJF) mutasaddilari ushbu arenaga yuqori baho berishdi. O'z o'rnida biz xalqaro ekspertlar etirofiga sazovor bo'lgan “Humo” arenadagi katta masshtabdagi ilk musobaqani yuqori saviyada o'tkazishimiz kerak”, - dedi O.Kasimov. 

Vazirning birinchi o'rinbosari musobaqaga ko'rilgan tayyorgarlik va uni o'tkazish bo'yicha olib borilayotgan ishlar bilan yaqindan tanishdi. Bu borada o'z ko'rsatmalarini berdi. 

Yig'ilishda ishtirok etgan O'zbekiston dzyudo federaciyasi rahbariyati 50 dan ortiq davlatdan kelayotgan sport delegaciyalari, martabali mehmonlarni kutib olish, mehmonxonalarga joylashtirish, musobaqa doirasida madaniy tadbirlarni tashkil etish, poytaxtimizning diqqatga sazovor maskanlariga sayyohatlar uyushtirish bo'yicha barcha ishlar shay holatga keltirib qo'yilganligi bo'yicha axborot berishdi. 

Eslatib o'tamiz, dzyudo bo'yicha Toshkent Gran-prisi ilk bor 2013 yilda bo'lib o'tgan edi. SHu kungacha o'tkazilgan barcha musobaqaga “O'zbekiston” sport saroyi mezbonlik qilgan.