Velosportchimiz Petropavloskdagi xalqaro musobaqada uchta medal qo'lga kiritdi

Mazkur nufuzli velopoygada Rossiya, Ozarbayjon, Belorus, Ukraina, Moldova, Kozog'iston, Qirg'iziston, Tojikiston hamda O'zbekistondan tashrif buyurgan 140 nafardan ortiq sportchilar va 16ta jamoa ishtirok etdi. Musobaqada B.Ismatov, D.Bocharov, A.Gafarov, S.Gorelikov, B. Rahimov va D.Sirko kabi velosportchilar katta murabbiy B.Nuratdinov boshchiligida sovrinli o'rinlar uchun kurash olib bordilar. 

Ko'pkunlik bellashuvlar yakuniga ko'ra hamyurtimiz Dmitriy Sirko turli yo'nalishlarda ikkita oltin, bitta bronza medallarini qo'lga kiritdi. Ushbu g'alaba orqali terma jamoamiz 16ta jamoa ichida ikkinchi o'rindan joy oldi.

“Ushbu velopoygada ilk marotaba ishtirok etdim. Bahslarda kuchli sportchilarning ishtirok etgani menga yanada masuliyat yukladi. Boz ustiga, birinchi bosqich poygalari vaqtida yoqqan kuchli yomg'ir bahslarni qiyinlashtirdi. SHunga qaramay, o'sha poygada uchinchi o'rinni egallay oldim. Qolgan yo'nalishlarda esa oltin medallarga sazovor bo'ldim” – dedi Sirko.