Yangi rais, murabbiylar bilan uchrashuv va Alisher Avezbaev. O'zbekiston boks federaciyasi rahbariyatining Qoraqalpog'istonga safari yakunlandi

Ushbu safardan ko'zlangan asosiy maqsad O'zbekiston boks federaciyasining Qoraqalpog'iston bo'linmasiga yangi rais tayinlashdan iborat edi. Bo'linmaga Baxtiyor Panaev rais etib tayinlangani haqida O'zbekiston boks federaciyasining rasmiy sayti va ijtimoiy tarmoqdagi sahifalari orqali xabar berdik.  

Qoraqalpoq zaminiga tashrif davomida Saken Polatov Nokis Olimpiya rezervlari kollejiga ham borib, u erdagi murabbiy va yosh sportchilar bilan uchrashdi. Uchrashuv davomida Respublika boksi rivojiga to'siq bo'layotgan muammolar o'rtaga tashlandi, murabbiylar oldidan yuzaga kelgan muammolar haqida gapirib berishdi. 

Rahbariyat bunday muammolar bosqichma-bosqich bartaraf etilishini, reja asosida Respublikada faoliyat olib borayotgan shifokorlar, hakamlar, murabbiylar malakasini oshirish uchun turli seminarlar tashkil etilishi haqida so'z bordi. 

SHundan so'ng mutasaddilar Qoraqalpog'iston boks markazi barpo etiladigan joyga borib, tashkiliy masalalarni muhokama qilishdi.

Nukus shahridagi 2-bolalar va o'smirlar sport maktabining mashg'ulotlar zali ham mehmonlarda yaxshi taassurot qoldirdi.

Darvoqe, mazkur safar davomida Osiyo o'yinlarida chempion bo'lgan qoraqalpog'istonlik bokschi Alisher Avezbaev ham ishchi guruh vakillariga hamrohlik qildi. O'zbekiston boks federaciyasi matbuot xizmati Qoraqalpoq boksining yaqin o'tmishdagi yulduzi, sobiq bokschimiz bilan intervyu tashkil etdi. Yaqin kunlarda ushbu intervyuni o'qishingiz mumkin bo'ladi.

SHu tariqa, O'zbekiston boks federaciyasi vakillarining Qoraqalpog'iston Respublikasiga qilgan safari nihoyasiga etdi.