Yaponiya terma jamoasi yarim yillik tanaffusdan so'ng mashg'ulotlarga qaytdi

O'quv-mashg'ulot yig'ini poytaxt Tokio shahridagi "Adjinomoto" Milliy mashg'ulot bazasida o'tkazilayotgan bo'lib, unda 17 nafar erkin kurashchilar ishtirok etayapti. So'nggi bor terma jamoa mart oyida yig'in o'tkazgandi. Aslida jamoa iyul oyida ham mashg'ulot o'tkazishi kerak edi. Lekin o'shanda yunon-rim va ayollar kurashidan keyin navbati kelgan erkin kurashchilarning yig'ini epidemologik vaziyat sabab bekor qilingandi.    

Ushbu yig'in dekabr oyida Belgradda o'tkazilishi kutilayotgan jahon chempionatiga tayyorgarlik vazifasini o'tab beradi. O'tgan yilning dekabr oyida o'tgan Yaponiya chempionati – Imperator Kubogida g'olib bo'lgan kurashchilar jahon chempionati yo'llanmasini qo'lga kiritishgan: Rio Olimpiadasining kumush medal sovrindori Rei Xiguchi (57 kg), 2018 yilgi jahon chempioni Takuto Otoguro (65 kg) va uning akasi Keysuke Otoguro (74 kg), jahon vice-chempioni Sosuke Takatani (86 kg), Noaya Akaguma (97 kg) va Tecuya Tanaka (125 kg). Yaponiyalik erkin kurashchilar 65 va 74 kg vazn toifalarida Tokio Olimpiadasi yo'llanmasini qo'lga kiritib ulgurishgan.