Yozgi Universiada: Hisobimizda 1 ta oltin va 2 ta bronza medallari!

Vakillarimiz orasidagi so'nggi chiqish aralash jamoaviy dastur finalida bo'ldi. Hal qiluvchi bahsga qadar Avstraliya, Koreya Respublikasi, Germaniya kabi terma jamoalarni musobaqadan chiqarib yuborgan Najmiddin Qosimxojiev, SHohjahon Karimboev, Madina Mirabzalova hamda Diyora Azizova to'rtligi finalda Misr vakillarini 2:1 (21:12, 8:18, 13:13) hisobida taslim etdi va turnirning oltin medaliga ega chiqdi.

Bu taekvondo terma jamoamizning musobaqa doirasidagi birinchi, O'zbekiston delegaciyasining esa uchinchi oltin medaliga aylandi. 

Biroz oldin erkaklar o'rtasidagi jamoviy dasturda SHohjahon Ahmedov, Umidjon Turobov va Marat Mavlonov uchligi musobaqada bronza medalini qo'lga kiritishgandi.

Bundan tashqari, bugundan musobaqa doirasida dzyudo bahslari boshlandi. 48 kg vazn toifasida yurtimiz sharafini himoya qilgan vakilamiz Laziza Haydarova bronza medali uchun kechgan bellashuvda polshalik Paulina SHlyaxtani mag'lubiyatga uchratdi va delegaciyamiz hisobiga yana bir medalni taqdim etdi.

Hozirda medallarimiz soni 13 tani tashkil qilmoqda: 3 ta oltin, 4 ta kumush va 6 ta bronza.