Yunon-rim kurashi ustalari Osiyo chempionatini muvaffaqiyatli boshlashdi

Quvonarlisi, ushbu kun dasturida gilamga chiqqan vakillarimiz 1 ta oltin, 2 ta kumush va 1 bronza medallariga sazovor bo'lishdi.

-55 kg vazn toifasida kurashgan Nankin o'smirlar Olimpiadasi chempioni Islomjon Bahromov finalda yaponiyalik Xiromi Katagari bilan bellashdi. Bahsda 1:1 hisobida qayd etilgan bo'lsa-da, so'nggi ochko vakilimiz tomonidan qo'lga kiritilgani ustunlikni Bahromovga taqdim etdi va shu tariqa u Osiyo chempionligini qo'lga kiritdi.

-63 kg vazn toifasida Rio Olimpiadasida bronza medali sovrindori Elmurat Tasmuradov finalda xitoylik Erbatu Tuo bilan bahsda 3:2 hisobida oldinda borayotgan payt jarohat oldi va murabbiylarimiz tavakkal qilmay, kurashchimizga bahsni davom ettirishga ruxsat berishmadi. SHu tariqa Tasmuradov kumush medal bilan taqdirlandi. SHuningdek, -130 kg vazn toifasidagi polvonimiz Mo'minjon Abdullaev ham finalda imkoniyatni boy berib, ikkinchi o'rinni egalladi.

Jahon chempionati finalchisi Rustam Assakalov (-87 kg) ham qita birinchiligidan medal bilan qaytadigan bo'ldi. Assakalov bronza medali uchun kechgan bellashuvda yaponiyalik Masato Sumidan 9:1 hisobida ustun keldi.