“Yurtingiz afsonaviy o'zbek velopoygachisi Abdujabborovning tezligidek rivojlanmoqda”

Bu mutaxassis sobiq velosportchi bo'lib, ayni damda ushbu sport sohasida jahonning eng etakchi mutaxassislaridan biri hisoblanadi. Xususan, 2012 yil Londonda o'tkazilgan yozgi Olimpiya o'yinlarida velosport bahslarida musobaqa o'tadigan hudud infrastrukturasini ishlab chiqqan. Ushbu mutaxassisni Milliy olimpiya qo'mitasi prezidenti Rustam SHoabdurahmonov kutib oldi. 

“Vestminster universitetining Toshkentdagi filiali yurtimizdagi eng oldi oliy o'quv-yurtlaridan biri hisoblanadi. Bu dargoh har yili mamlakatimiz uchun yuzlab malakali kadrlarni tayyorlab berishi bilan hurmat qozongan. Muhtaram Prezidentimiz O'zbekistonda sportni rivojlantirish yo'lida xorijlik mutaxassislarni jalb qilishga alohida urg'u bermoqda. Qolaversa, mamlakatimizni rivojlantirish yo'lida 5 ta muhim tashabbusdan biri ham aynan sportga qaratilgan. Sizning velosportga ham qiziqishingiz ushbu sport rivojini yurtimizda yangi bosqichga olib chiqishiga ishonaman”, – dedi Rustam SHoabdurahmonov. 

O'z navbatida Piter Bonfild ham yurtimizga qilgan tashrifidan olgan taassurotlari haqida gapirib berdi. 

“Olimpiya harakati dunyodagi barcha insonlarni bir maqsadda birlashtiradi. O'tgan yili ham O'zbekistonga tashrif buyurgan edim. Lekin bugun kelib, butunlay boshqacha qiyofa ko'rmoqdaman. Yurtingiz xuddi afsonaviy o'zbek velosportchisi Jamoliddin Abdujabborovning tezligidek rivojlanib bormoqda. So'nggi 20-30 yil ichida Buyuk Britaniyada velosport rivoji katta bosqichga chiqdi. Bunda mamlakatimizda qo'llanilgan “UK active” loyihasi asosiy omil bo'ldi. Men har doim jahonda velosport rivojlanishi tarafdori bo'lib kelganman. Bu yo'lda qanday yordam kerak bo'lsa, men tayyorman”, – dedi Piter Bonfild. 

Suhbat davomida har ikki tomon o'zaro hamkorlik masalalari bo'yicha atroflicha muhokama olib borishdi. SHuningdek, martabali mehmon 2 kundan so'ng poytaxtimizda o'tkazilayotgan velotrek bo'yicha mamlakat chempionatiga tashrif buyurishini takidlab o'tdi.