Zagreb Gran-prisi. 86 davlat orasida kuchli beshlikdan joy oldik

Musobaqada sayyoramizning 86 davlatidan sara polvonlar uch kun davomida Gran-pri medallari hamda Tokio-2020 Olimpiadasining qimmatli reyting ochkolari uchun bahs olib borishdi. Zagreb tatamilarida 13 nafar dzyudochimiz yurtimiz sharafini himoya qildi. 

Yakunda -60 kg vazn toifasidagi vakilimiz SHarofiddin Lutfullaev barcha raqiblarini mag'lubiyatga uchratib, beshinchi bor Gran-pri turnirining oltin medalini qo'lga kiritdi. +100 kg vazn toifasidagi 20 yoshli polvonimiz Alisher Yusupov esa musobaqaning bronza medalini qo'lga kiritdi. 

SHu tariqa, O'zbekiston terma jamoasi Zagreb Gran-prisini bittadan oltin va bronza medali bilan umumjamoa hisobida 86 davlat orasida beshinchi o'rinda yakunladi. Sloveniya terma jamoasi ham biz bilan bir xil ko'rsatkichga ega bo'ldi. 

Dzyudo vatani Yaponiya terma jamoasi 4 ta oltin va 4 ta kumush medal bilan birinchi o'rinni egalladi. Kuchli uchlikdan 2 tadan oltin medalga ega Kanada va Gruziya terma jamoalari joy olishdi. 

To'qqiz mamlakat - Yaponiya, Kanada, Gruziya, Buyuk Britaniya, Sloveniya, O'zbekiston, Isroil, Qozog'iston va Ispaniya terma jamoalari dzyudochilariga o'z uylariga kamida bitta oltin medal bilan qaytish nasib qildi. Jami 26 ta terma jamoa kamida bitta bronza medalini qo'lga kiritdi.