Zalga 20 kunligida kelgan chaqaloq, Olimpiada chempioni, "Sport Oskari" sohibi, uch yildan beri mag'lub bo'lmay kelayotgan "Tilla bola" yana bir yoshga ulg'aydi

Umidjon Jalolov 2002 yil 12 iyul kuni Buxoro shahrida tug'ilgan. Otasi O'tkir aka Umidjon 20 kunlik chaqaloq payti uni kurash zaliga olib kelgan va murabbiy Latif Xalimovga "o'g'lim Umidjon bugundan sizning shogirdingiz" deya niyat qilgan ekan. Yaxshi niyat, yarim davlat deb bejizga aytishmaydi. Yigirma kunligida erkin kurash zaliga kelgan chaqaloq oradan yillar o'tib, uni butunlay zabt etdi.  

"O'sha kunni juda yaxshi eslayman. Otasi O'tkir bilan bolalikdan qalin do'stmiz. Bundan 18 yil oldin zalga 20 kunlik chaqaloqni olib kelib, u sening shogirding bo'ladi degandi. O'tgan yillar davomida biz aytishga arzigulik yutuqlar va shu bilan birga mashaqqatli yo'lni bosib o'tdik. Men Umidjon bilan faxrlanaman", - deydi Latif aka. 

Xalqaro toifadagi sport ustasi Umidjon Jalolov o'smirlar o'rtasida ikki karra Osiyo chempioni (2017, Bangkok), (2018, Toshkent), jahon chempioni (2019, Sofiya), Argentinada o'tkazilgan III yozgi o'smirlar Olimpiya o'yinlari g'olibi (2018, Buenos-Ayres) hisoblanadi. U erishgan natijalari uchun "Sport Oskari" - "Oltin mangust" sovriniga ham ega chiqqan. Biz u zafar quchgan xalqaro musobaqalarni hali sanamadik. Bunga ancha vaqt kerak bo'ladi. 

Fursatdan foydalanib, uch yildan beri mag'lubiyat nimaligini bilmay kelayotgan, -57 kg vazn toifasi etakchisi bo'lishga intilayotgan Umidjon Jalolovni bugungi unutilmas sana - tavallud kuni bilan muborakbod etamiz.