Борральо тайёр: "Дю Плесси ёки Чимаев жароҳат олиши мумкин"

Бразилияликнинг сўзларига кўра, у суғурта қилаётган жангчилардан бирида аллақачон муаммолар пайдо бўлган, бу эса Чикагодаги UFC 319 турнирининг асосий воқеасини хавф остига қўяди.

"Улар ким жароҳат олиши мумкинлигини айтишмади. Хамзатми ёки Дрикус, муаммо нимада эканлиги аниқ эмас, лекин шундай бўладиган кўринади. Чунки илгари захира бўлмайди дейишганди ва бирдан керак бўлиб қолди. Демак, нимадир бўляпти, лекин аниқ нималигини билмайман.

Мантиқан олиб қараганда, Чимаевнинг сафдан чиқиш эҳтимоли юқорироқ. Сабаби, у буни бир неча бор амалга оширган. Биз биламизки, у ақлдан озган одам каби машқ қилади ва шу сабабли тез-тез жароҳат олади. Лекин яқинда унинг соппа-соғлигини, жиддий шикастланмаганини эшитдим. Дрикуснинг ишлари қандай кетаётганини билмайман - у ижтимоий тармоқларда деярли ҳеч нарса ёзмайди", - деди Борральо.

Агар жароҳат ҳақидаги маълумот тасдиқланмаса, Борральо Чимаевда вазн пойгаси билан боғлиқ муаммолар юзага келиши мумкинлигини истисно қилмаяпти.

"Чимаевда мени ҳавотирга солаётган нарса - унинг вазни. Мен унинг суратини кўрдим ва у гавда жиҳатидан жуда катта кўринди. Биламизки, у лимитни бажаришга қийналмоқда. Нима бўлганда ҳам, меҳмонхонадан аренага етиб келгунимча тайёр тураман. Унгача бор эътиборимни жангга қаратаман," - дея сўзларига якун ясади Маҳмуд Мурадовнинг собиқ рақиби Кайо.