Дониёр Рихсибоев: "Мақсадимиз - шогирдларимиз халқаро ареналарда юртимиз шаънини улуғлаш"

Тошкент вилояти ёшлар сиёсати ва спорт бош бошқармаси тасарруфидаги Яккакураш спорт турларига ихтисослаштирилган спорт мактабида тарбияланувчиларининг ҳам ягона орзу-истаклари спортда етакчилар қаторидан жой олиш. Мазкур спорт мактабида айни пайтда спортнинг бокс, велоспорт (шоссе), велоспорт (мтб), дзюдо, оғир атлетика, таэквондо WТ, эркин кураш, юнон-рум кураши, ўқ отиш, кураш, қўл жанги, шотакан каратэ-до, паравелоспорт, пара пауэрлифтинг турлари бўйича 793 нафар ўғил-қизлар 72 нафар малакали мураббийлар қўл остида машғулотларда иштирок этишади.  

Спорт мактабида машғулотларга зўр бераётган ёшларнинг мусобақалардаги натижаларини эътирофга лойиқ дейиш мумкин. Маълумотларга кўра, биргина жорий йилнинг ўтган олти ойи якуни бўйича Ўзбекистон чемпионати ва кубогида 77, Осиё чемпионати ва кубогида 8, Жахон чемпионати ва кубоги беллашувларида 3 нафар спортчи ғолиб ва совриндорлар сафидан ўрин эгаллаган.

Жумладан, таэквондо WТ бўйича бўлиб ўтган жаҳон чемпионатида Светлана Осипова кумуш, Феруза Содиқова бронза медалларига эгалик қилишган бўлса, Тошкент шаҳрида бокс бўйича катталар ўртасида ўтказилган жаҳон чемпионатида Ойбек Жўраев кумуш медалга эга чиққан.  

Шунингдек, Осиё чемпионати ва кубоги мусобақаларида Абдулла Ражабов, Муҳаммадқодир Мамиржонов (бокс), Одинахон Ҳамдамова, Миржалол Қурбонов (пара велоспорт), Покиза Камолиддинова, Артём Штурбабин (кураш), Ихтиёр Ботиров (юнон рум-кураши), Жамила Панфилова (оғир атлетика) ғолиб ва совриндорлар қаторидан ўрин эгаллашга муваффақ бўлишган. 

Бундан ташқари спорт мактабининг спортчи-ўқувчиларидан бўлган Жавоҳир Сохибов (ўқ отиш), Мирзакамрон Юнусов (бокс), Шоҳрух Саидов (бокс) Ўзбекистон чемпионати ва кубоги ҳамда халқаро мусобақаларда юқори натижаларга эришгани боис, олий таълим муассасаларига имтиёзли кириш йўлланмасига эга бўлишган.

Ёки яқинда Беларусь Республикасида бўлиб ўтган II МДҲ давлатлари ўйинларида Гулбону Қамбарбекова олтин (ўқ отиш), Жамила Панфилова олтин  (оғир атлетика), Илёсжон Абдуназаров 5-ўрин (юнум-рум кураш), Алимардон Абдуллаев 5-ўрин (юнум-рум кураш), Аселхон Аралбаева бронза (дзюдо), Акере Сагиндикова бронза (дзюдо), Зарина Жамалова бронза (дзюдо), Шавкатжон Болтаев олтин (бокс) ҳамда Қобилжон Аҳмедов олтин (самбо) медалларини қўлга киритиб, юртимиз шарафини муносиб ҳимоя қилишган. 

Эътиборлиси, бугун спорт мактабининг 83 нафар шуғулланувчилари спорт турлари бўйича Ўзбекистон терма жамоаларининг асосий ва заҳира таркиби аъзолари саналишади. Спорт мактаби томонидан 8 нафар “Халқаро тоифадаги спорт устаси” ва 23 нафар "Спорт устаси” унвонли спортчилар тайёрланган.

Шунингдек, мазкур Яккакураш спорт турларига ихтисослаштирилган спорт мактаби директори Дониёр Рихсибоев бошчилигидаги жамоа яшил макон умуммиллий дастурига ҳам алоҳида эътибор қаратган дейиш мумкин. Боиси,   спорт мактабининг Ангрен шаҳри, Бўстонлиқ туманидаги Чорвоқ қўрғонида жойлашган спорт базалари ҳудудлари турли хил манзарали ва мевали дарахт кўчатлари экилиб, парвариш қилинмоқда.

Дониёр РИХСИБОЕВ, Тошкент вилояти ёшлар сиёсати ва спорт бош бошқармасига қарашли Яккакураш спорт турларига ихтисослаштирилган спорт мактаби директори:

- Жисмоний тарбия ва спортни, жумладан, болалар спортини ривожлантириш, оммавийликни таъминлаш асосий вазифаларимиздан саналади. Спорт мактабимизда мавжуд спорт турлари бўйича машғулотларга зўр берган ўғил-қизларимиз орасида истеъдодли, метин иродали спортчилар кўпчиликни ташкил этади. 

Селекция ишлари орқали яна ҳам иқтидорли ёшларни жалб этиб, уларнинг маҳоратларини ошириб бориш ва катта спорт сари йўналтириш, мамлакат терма жамоаларига муносиб издошларни етказиб бериш ва шу орқали халқаро спорт майдонларида, олимпия ўйинларида юртимиз шаъни ва обрўси учун бор маҳоратини намоён этиб, энг кучли спортчилар қаторида кўриш бош мақсадларимиздан ҳисобланади. Бир сўз билан айтганда,  машғулотлар авжи палласида, яратилаётган қулай шароитлардан мақсадли фойдаланаётган ўғил-қизлар иродаларини мустаҳкамлаб, чемпионлик томон дадил боришмоқда.   

Илҳом РАҲМОНОВ тайёрлади