Исраэль Адесанья: "Яна таваккал қилмоқчиман"

"Ҳозир мен учун камар асосий нишон эмас. Мен шунчаки жанг қилмоқчиман. Чемпионлик йўлида нима қилган бўлсам, шуни амалга оширмоқчиман. Ҳа, мен камар ҳимоясида ҳам жуда яхши ҳаракат қилгандим, лекин энди эркинроқ жанг услубига ўтмоқчиман. Мен яна аввалгидек таваккал қилишни хоҳлайман", - деди нигериялик Таиланддаги Bangtao Muay Thai & MMA клубида ўтказилган савол-жавоб сессиясида.

Адесаньянинг сўзларига кўра, у келаси йили октагонга қайтади, аммо энди чўққига қайтиш осон бўлмайди

"Ҳар куни менга шундай дейишади: "Эй, сен фаолиятингни тугатганмисан?" Илгари: "Йўқ, мен шунчаки танаффус қилиб, бошқа ишлар билан шуғулланяпман" деб тушунтиришга мажбур бўлардим. Энди эса мен шунчаки: "Ҳа, мен фаолиятимни якунладим" деб жавоб бераман. Мени постерда кўрмагунларича шундай ўйлайверишсин", - дея изоҳ берди собиқ UFC чемпиони.

Жорий йилнинг февраль ойида Исраил Адесанья иккинчи раундда техник нокаут эвазига Нассурдин Имавовга имкониятни бой бериб, кетма-кет учинчи мағлубиятини қабул қилиб олганди. Айни пайтда у ташкилотнинг ўрта вазн рейтингида олтинчи ўринни эгаллаб турибди.