Миллий федерациялар Олимпиаданинг бокс мусобақасидаги вазн тоифалари бўйича эътироз билдиришяпти

Ҳозирда бир нечта Миллий бокс федерациялари, хусусан Хитой расмийлари World Boxing федерациясига мурожаат қилиб, бу борада ўз эътирозини билдирган. Бу йилдан айнан World Boxing ташкилоти Олимпия ўйинлари дастуридан ўрин олган бокс мусобақаларини ташкил этиш ва ўтказишга масъул этиб белгиланган. 

Норози бўлаётган миллий федерациялар вазн тоифаларини қайта кўриб чиқишни сўрашмоқда. Irish News нашри хабарига кўра, Хитой позициясини Ирландия бокс федерацияси ҳам қўллаб-қувватламоқда. Ирландияликлар Олимпия ўйинларида бир неча бор енгил вазн тоифаларида медалларни қўлга киритишган. Бу икки давлат айнан енгил вазнларни қўшиш бўйича сўров киритишган.  

Шунингдек, қатор миллий федерациялар эркаклар ўртасидаги вазнларнинг энг енгил вазннинг олиб ташланиши эвазига камайтириб, 7 тага тушириб қўйилганига ҳам норозилик билдиришган. Лос-Анжелес Олимпиадасидаги энг енгил вазн 55 кг бўлади. 2020 ва 2024 йилги Олимпия ўйинларида мос равишда 52 ҳамда 51 кг вазн тоифаларида медаллар ўйналган. Рио-2016 Олимпиадасида 49 кг вазнда ҳам жанглар ташкил этилган. Ҳасанбой Дўсматов Рио ва Париж Олимпиадаларида терма жамоамизга олтин медални тақдим этган эди. 

Эслатиб ўтамиз, янги Олимпия циклида эркаклар 55, 60, 65, 70, 80, 90, +90 кг, аёллар эса 51, 54, 57, 60, 65, 70 ва 75 кг вазн тоифаларида тўрт йилликнинг энг нуфузли мусобақаси медаллари учун баҳс олиб боришади.