Нодирбек Абдусатторов ва яна уч гроссмейстеримиз Sharjah Masters турнирида иштирок этади

Кеча Руминиянинг Бухарест шаҳрида якунига етган турнирнинг сўнгги турида ўйнаган Нодирбек Абдусатторов бугун деярли дам олишсиз бошқа давлатдаги мусобақанинг биринчи тур учрашувида дона суради. Абдусатторов Sharjah Masters турнирида биринчи рақам остида таснифланган. У бугун соат 17:00да бошланадиган 1-тур учрашувида қора доналарда ҳиндистонлик гроссмейстер Панаяппан Сетхураманга қарши баҳс олиб боради.

Мукофот жамғармаси 73 000 АҚШ долларини ташкил этувчи ушбу мусобақада Нодирбек Абдусатторовдан ташқари яна уч гроссмейстеримиз - Жаҳонгир Воҳидов, Муҳиддин Мадаминов ва Ортиқ Ниғматов ҳам совринли ўринлар учун баҳсларга киришади. 

Sharjah Masters 2025 турнири швейцарча тизимда ўтказилиб, 9 турдан иборат бўлади. Вақт назорати 90 дақиқа ва ҳар бир юришга қўшимча 30 сония вақт қўшиб берилади. Нидерландиялик Аниш Гири мусобақада Нодирбекдан кейин иккинчи рақам остида сараланган. 

Шахматчиларимизнинг бугунги 1-тур учрашувлари:

Панаяппан Сетхураман (Ҳиндистон) - Нодирбек Абдусатторов

Жаҳонгир Воҳидов - Амин Табатабайи (Эрон)

Муҳиддин Мадаминов - Сянюй Сюй (Хитой)

Ортиқ Ниғматов - Пранав Ананд (Ҳиндистон)