Пэдди Пимблетт: "Топурия камарини бўшатиб қўяди"

"Ҳозир унинг шахсий ҳаётида кўп нарсалар содир бўлмоқда, мен унга фақат яхшилик тилайман. Бу бизнинг эҳтимолий жангимизга ҳеч қандай алоқаси йўқ. Бу унинг оиласи ва умид қиламанки, унда ҳаммаси яхши бўлади. Чин дилдан умид қиламанки, ҳаммаси энг яхши тарзда кечади.

Мени фақат бир нарса ташвишлантиради - у билан октагонга чиқиб, муштлашишим керак. Шахсий ҳаётига тааллуқли ҳамма нарсада унга омад тилайман, лекин нима бўлишини ҳеч қачон билмайсан. Агар у июнь-июль ойларигача сафга қайтмаса, камарни бўшатишига тўғри келиши мумкин. Бу ҳолатда мен бирлаштирувчи жангга чиқмасдан ҳам амалдаги чемпионга айланаман", - деди британиялик аралаш яккакураш устаси. 

Агар воқеалар ривожи Пимблетт айтгандек бўлиб чиқса, у камар ҳимоясини кимга қарши ўтказишни хоҳлашини аллақачон билади. Ва бу дивизион рейтингида биринчи ўринни эгаллаб турган Арман Царукян эмас.

"Менимча, меросим учун Чарльз Оливейра ёки Макс Холлоуэй билан жанг қилиш анча муҳимроқ бўларди. Уларнинг жангларини томоша қилишни яхши кўраман. Чарльзга қарши жангим ажойиб бўлишини кўп йиллардан бери айтиб келаман. Агар у Максдан ўтиб олса, жон-жон деб у билан муштлашардим.

Арман эса навбатда туриб, айтилган ишни қилаверсин. У кўпинча бундай қилмайди, чунки отаси унга ҳамма нарсани сотиб олиши мумкин деб ўйлайди, чунки уларнинг пули кўп. Аммо Арман узоқроққа бориши ҳам мумкин. У ҳақида эшитишдан чарчадим", - дея тушунтирди Пимблетт.

Маълумот учун, Пэдди Пимблетт 24 январь куни Лас-Вегасда бўлиб ўтадиган UFC 324 турнирида Жастин Гэтжига қарши октагога чиқади. Ушбу жанг енгил вазн тоифасида вақтинчалик чемпионлик камари учун кечади. 7 март куни эса UFC 326 турнирида Макс Холлоуэй ва Чарльз Оливейра ўртасида жанг бўлиб ўтади.