Хоккей. Ўзбекистон U-18 терма жамоаси ўз дивизионида чемпион бўлди ва юқори лигага йўл олди

28 февраль - 6 март кунлари Таиланд пойтахти Бангкок шаҳрида бўлиб ўтган турнирда йигитларимиз илк уринишдаёқ юқорироқ дивизионга кўтарилишди. Вакилларимиз келаси мавсумда U-18 Жаҳон Чемпионатида III дивизионнинг А гуруҳида иштирок этишади.

Ўзбекистон терма жамоаси гуруҳдаги барча ўйинларда ғалаба қозонди: Жанубий Африка Республикаси (12:0), Люксембург (12:1), Туркманистон (8:2) ва Босния ва Герцеговина (11:3). Ниҳоят, 6 март куни ҳал қилувчи баҳсда Таиланд жамоаси устидан 3:2 ҳисобида қийин ғалабага эришилди. 

Ўтган йили бизнинг йигитлар Таиланд терма жамоаси билан Осиё ва Океания Кубогида (Тошкент ва Самарқанд, апрель 2024) икки бор тўқнаш келишган эди. Ўшанда Ўзбекистон чемпион бўлиб, гуруҳ босқичида таиландликларни 7:5 ҳисобида, финалда эса 2:1 ҳисобида енгган эди. Бу сафар жаҳон чемпионатида кураш яна ҳам кескин кечди. Ғалаба келтирган шайбани учрашув тугашига 5 дақиқа қолганида Жамоамизнинг энг яхши бомбардирларидан бири – Жасурбек Рустамхонов киритди.

Жамоа сардори Рустамхонов 5 ўйинда 22 очко (14 гол + 8 ассист) жамғариб, турнирнинг энг яхши ўйинчиси деб топилди. Жасур, шунингдек, ёш юлдуз Салоҳиддин Азимов ўтган мавсумни Чехияда ўтказди. Қолган йигитлар эса Қозоғистон ёшлар лигасида "Tashkent Select" жамоаси сафида ўйнашди.

Ўзбекистоннинг ушбу терма жамоаси Тошкентнинг иккита клуби – "Ҳумо" ва "Бинокор" тарбияланувчиларидан иборат. Улар 2018 йилда ташкил этилган Ўзбекистон Хоккей Федерациясининг муваффақиятли фаолиятининг натижасидир. Бугун улар ЎХФнинг фахри!

Чемпионларимизни тайёрлаган мураббийлар штабини алоҳида тилга олиш лозим – Нормундс Сеейс, Абдумажид Носиров ва Роман Кривомазовга ташаккур!

Апрель ойида Ўзбекистон миллий терма жамоаси ҳам жаҳон чемпионатида ўз дебютини ўтказади. Улар IV дивизионда Арманистонда ўтадиган мусобақада қатнашишади. Таркиб тажрибали ўйинчилардан иборат бўлса-да, асосий куч бугун Бангкокда Жаҳон Кубогини кўтариб турган йигитлар бўлади.