37 ёшли Федерер Якуний турнирнинг ярим финалига чиқди

Соврин жамғармаси 8 миллион долларни ташкил қилувчи Якуний турнирда дунё рейтингининг кучли саккизталигидан жой олган ракетка усталари бош соврин учун баҳс олиб боришмоқда. Дунёнинг учинчи ракеткаси Рожер Федерер илк турдаги мағлубиятдан сўнг кетма-кет иккита ғалабага эришди. 

Швейцариялик 37 ёшли теннис юлдузи Ллейтон Хьюитт гуруҳининг учинчи учрашувида рейтингнинг олтинчи поғонасидан жой олган Жанубий Африка Республикаси вакили Кевин Андерсонни мағлуб этди. Бир соату 17 дақиқа давом этган баҳсда Рожер 6/4, 6/3 ҳисобида зафар қучди. 

Шу тариқа, бир мағлубият ва икки ғалабага эришган Федерер гуруҳда биринчи ўрин билан ярим финалга йўл олди. Гарчи мағлубиятга учраган бўлса-да, Андерсон ҳам иккинчи ўрин билан Nitto ATP Finals турнирининг ярим финалига чиқди.