37 ёшли Жозе Альдо чемпионлик камарини кўзлаяпти

Жангдан кейин бразилиялик тажрибали аралаш яккакураш устаси енгил вазн (61 кг) тоифаси камари учун октагонга чиқиш истагида эканини яширмади. Альдо ташкилотдан кейинги жангини чемпионлик учун қилиб беришларини сўради.   

"Ўз ватанимда ўтган рақамланган UFC турнирининг бир бўлаги бўлганимдан хурсандман. Бу ерда бўлишимнинг ўзи катта омад. Боиси, ташкилот раҳбарлари билан январь ойида музокара олиб борганимда, уларда Риода турнир ўтказиш режаси йўқ эди. Менимча, мен навбатсиз чемпионлик камари учун жанг қилишим керак. Нега? Чунки кетаётган пайтимда рейтингим яхши бўлган. Агар навбатсиз камар учун жанг қилсам, зўр иш бўлар эди. Кичик танаффусдан сўнг яна машғулотларга қайтаман. Янги чорловларни қабул қилишга тайёрман", — деди Альдо.

Эслатиб ўтамиз, Альдо UFC 301 турнирида ҳакамларнинг якдил қарори билан америкалик Жонатан Мартинесни очколар ҳисобига кўра мағлубиятга учратганди.