Абдураимова Қаршидаги турнирда 1/4 финалга чиқди

Соврин жамғармаси 25 000 АҚШ долларини ташкил қилувчи мусобақанинг яккалик баҳсларида бугун иккинчи давра учрашувлари ўтказиляпти.

Қувонарлиси, турнирнинг биринчи рақамли теннисчиси сифатида қайд этилган Нигина Абдураимова бу босқичда ғалабага эришиб, чорак финалга йўл олди.

Ҳамюртимиз ҳозиргина якунига етган баҳсда россиялик Анастасия Фроловага қарши кортга чиқди. Бир дақиқаси кам 2 соат давом этган учрашувда Нигина рақибасини 6:3, 3:6, 6:3 ҳисобида мағлуб этди.

Эслатиб ўтамиз, кеча Абдураимова 2 соату 49 дақиқа давом этган биринчи давра учрашувида руминиялик Михаэла Бузарнескуни 7:6, 6:7, 6:3 ҳисобида таслим этган эди.