АГМК мусобақадаги дебютида Осиё гиганти билан дуранг ўйнади

"A" гуруҳидаги 1-тур ўйинини "Ал Ҳилол"га қарши ўтказган жамоамиз мусобақадаги илк очкосини қўлга киритди.

Ўйинни дадил бошлаган жамоамиз рақибга нисбатан қўллаган прессинги натижасида "Ал Ҳилол" дарвозабони Маюф хатога йўл қўйди ва бу вазиятда ҳозир-у нозир бўлган Зафар Полвонов гол уришни уддасидан чиқди.

Кейинчалик ҳам жамоамизда гол уриш учун имкониятлар вужудга келди. Полвонов дублни расмийлаштириши мумкин бўлган бўлса, Ғофуров ва Қосимовда ҳам вазиятлар бўлди. Бироқ учрашувдаги иккинчи гол рақиб тарафидан урилди. Аниқроғи, "Ал Ҳилол"нинг ўнг қанотдан уюштирган ҳужумини бартараф этишга чоғланган Раҳмонов кутилмаганда тўпни қайтариш чоғида ўз дарвозасини ишғол этиб қўйди. 

Орадан кўп ўтмасдан ҳужумга отланган жамоамиз Турсуновнинг аниқ зарбаси орқали яна ҳисобда олдинга чиқиб олиши мумкин эди. Бироқ бу вазиятда Маюф адашмади. Кейинги вазиятда эса Вьеттонинг хавфли зарбасини Валижон Раҳимов бартараф этди. 

"Ал Ҳилол" танаффусга қадар ҳисобдаги фарқни ўз томонига оғдирди. Ҳимоядаги тўп йўқотиш натижасида "Ал Ҳилол" ҳужуми кескинлашди ва Каррильо узатмасини Вьетто голга айлантирди.

Иккинчи таймни эса жамоамиз янада ишончли ва дадиллик билан бошлади. Чап қанотдан олдинга борган Гадоев ўткир бурчакдан дарвозанинг яқин бурчагини нишонга олди. Бироқ Маюф жамоасини голдан қутқарди.

Миржалол Қосимов иккинчи бўлимда ҳам бир қатор ўзгаришларни амалга оширди ва бу ўз навбатида ўйинга ҳам бурилиш ясади. Учрашувнинг 70-дақиқасида Санжар бошлаган ҳужумни бошқа Санжар самарали якунлади. Турсунов тўпни ўнг қанотдан олдинга бораётган Аҳмадалиевга узатди, Дилшод эса жарима майдончаси ичига оширган тўпга курашган Полвонов дарвозабонга халақит берди ва тўп Шоаҳмедовга келиб тушди. Санжар Шоаҳмедов эса бундай қулай имкониятдан оқилона фойдаланиб, ўйинда мувозанатни тиклади.

Шундан сўнг "Ал Ҳилол" ҳам ҳужумга ўтишга мажбур бўлди. Бироқ шу куни ҳимояда мустаҳкам ўйнаган қўрғонларимиз рақибга жарима майдончаси ичида енгил нафас олишга йўл қўйишмади. Фақатгина узоқдан берилган зарбалар эвазига "Ал Ҳилол" кескинлик яратишга уринди. Бир вазиятда Отайфнинг жарима майжончаси атрофиданг йўллаган хавфли зарбасини Валижон маҳорат кўрсатиб бартараф этди.

Кейинги вазиятни эса вакилларимиз яратишди. Элвин Фортес қанотдан марказга кўчиб, тўпни дарвоза томон йўллади. Бироқ унинг зарбасига аниқлик етишмади. 

Учрашувнинг ҳал қилувчи вазиятига айланиши мумкин бўлган Шоаҳмедов томонидан тепилган тўпни рақиб ҳимоячилари бир амаллаб қайтариб юборишди. Тўп қўлга ёки қўл тўпга тегдими деган саволга ҳакам Рюжи Сато тўп қўлга тегди, деган қарор чиқаришни маъқул топди. Натижада Шоаҳмедовнинг дарвозага тепган тўпи рақиб ҳимоячиларининг қўлига тегиб манзилини ўзгартирди.

Шу тариқа АГМК Осиё чемпионлар лигаси гуруҳ босқичидаги илк ўйинида "Ал Ҳилол"дан очко олишни уддалади.

ОЧЛ, гуруҳ босқичи.

"A" гуруҳи, 1-тур.

15 апрель, пайшанба.

"Ал Ҳилол" - АГМК 2:2

Ар-Риёд, "Шаҳзода Файсал бин Фаҳд" стадиони.

Голлар: Раҳмонов (27-автогол), Вьетто (37) - Полвонов (11), Шоаҳмедов (70)

Ҳакамлар: Рюжи Сато, Хироши Ямаучи, Жун Михара (Япония), Али Ҳасан Абдулнаби (Баҳрайн).

Комиссар: Башир Абдул Холиқ (Ливан).

"Ал Ҳилол" — 1.Абдуллоҳ Ал Майюф, 2.Муҳаммад Ал Бурайк (22.Амир Курди, 83), 5.Али Хади Ал Булайҳи, 8.Абдуллоҳ Отайф, 10.Лусиано Вьетто (26.Фаваз Ал Тераис, 63), 12.Ёсир Ал Шаҳрони, 18.Бафетимби Гомис, 19.Андре Карильо (16.Носир Ал Давсари, 75), 20.Жанг Хюн Су (70.Жаҳфали, 83), 27.Хатан Бахбри (11.Солиҳ Ал Шеҳри, 75), 28.Муҳаммад Канно.

Захира: 31.Хабиб Ал Ватян, 32.Мутеб Ал Муфарриж, 22.Амир Курди, 23.Мадаллаҳ Ал Олаян, 55.Ҳамад Ал Абдан, 70.Муҳаммад Жаҳфали.

АГМК (4-3-3) — 35.Валижон Раҳимов - 77.Дилшод Аҳмадалиев (20.Мирғиёс Сулаймонов, 86), 8.Бобур Йўлдошев, 7.Сардор Раҳмонов, 2.Акром Комилов - 23.Йован Жокич, 4.Миржамол Қосимов (22.Санжар Шоаҳмедов, 62), 17.Санжар Турсунов (5.Дилшод Жўраев, 86) - 11.Мурод Тошматов (94.Элвин Фортес, 62), 9.Зафар Полвонов, 10.Ҳусниддин Ғофуров (28.Шоҳруҳ Гадоев, 41).

Захира: 1.Ботирали Эргашев, 32.Суҳроб Султонов - 15.Аббос Отахонов, 21.Санжар Жумабоев, 22.Санжар Шоаҳмедов, 29.Владимир Козак.

Огоҳлантириш: Шоаҳмедов (90)