“Ал Шабаб”да илк мағлубият, Ҳайдаров бир бўлим ўйнади

Терма жамоамиз ярим ҳимоячиси Азиз Ҳайдаров тўп тепаётган “Ал Шабаб” клуби сафарда ОЧЛ-2016 финалчиси бўлиб турган “Ал Айн” меҳмони бўлиб, аламли мағлубиятни қабул қилиб олди.

Учрашувда “Ал Айн” 2:1 ҳисобидаги қийин ғалабани қўлга киритди. Дастлаб  54-дақиқада Кайо майдон эгаларини ҳисобда олдинга олиб чиқди. 77-дақиқада “Ал Шабаб” футболчиси Ҳассан Иброҳим майдондан четлатилди.

Шунга қарамай, бир киши кам бўлиб қолган меҳмонлар 81-дақиқада Рашид Ҳассаннинг голи эвазига мувозанатни тиклашди. Лекин ҳакам томонидан асосий вақтга қўшиб берилган дақиқада Диаки Ибрахим “Ал Айн”га ғалаба келтирган голни киритди.

Учрашувни бошланғич таркибда бошлаган ҳамюртимиз Азиз Ҳайдаров майдонда бир бўлим ҳаракат қилди. Бу “Ал Шабаб”нинг чемпионатдаги илк мағлубияти бўлди. Дубайликлар 13 очко билан 4-поғонадан жой олишган.