Алькараз деярли 4,5 соат давом этган учрашувда Рамосни мағлуб этди

Жаҳоннинг олтинчи ракеткаси, испаниялик Карлос Алькараз Франция Очиқ чемпионатининг учинчи босқичига йўл олди. 19 ёшли Карлос турнир фаворитларидан бири саналади.

Алькараз иккинчи даврада ҳамюрти Альберт Рамос-Виньоласни 6/1, 6/7, 5/7, 7/6, 6/4 ҳисобида мағлуб этди. 

Учрашув 4 соату 38 дақиқа давом этди. Ўйин давомида Алькарас 10 та эйс зарбасини амалга ошириб, 2 бор қўш хатога йўл қўйди ва 8 та брейкдан унумли фойдаланди. Виньолас эса 2 та эйс, 2 та қўш хато ва 6 та брейк қайд этди.

Кейинги босқичда Алькараз Себастьян Корда қарши кураш олиб боради.

Эслатиб ўтамиз, "Ролан Гаррос"нинг умумий мукофот жамғармаси 43,6 миллион еврони ташкил этади. Мусобақанинг амалдаги чемпиони жаҳоннинг биринчи ракеткаси сербиялик Новак Жокович ҳисобланади.