Almaty Open. Одил Каримов чорак финалда, қолганларда мағлубият

Almaty Open мусобақасининг ўғил болалар ўртасидаги баҳсларида 3 нафар теннисчимиз илк даврада ғалабага эришиб, иккинчи босқич йўлланмасини қўлга киритишганди. Улардан фақат бир нафари чорак финалга чиқди.

Турнирнинг биринчи ракеткаси бўлган ҳамюртимиз Одил Каримов иккинчи давра учрашувида россиялик Максим Масловни 6:2, 6:2 ҳисобида таслим этди. Унинг ярим финал остонасидаги рақиби қозоғистонлик Малик Омарханов бўлади.  

Илк босқичда турнирнинг учинчи ракеткаси, россиялик Акшин Мехтиевни 6:4, 6:3 ҳисобида енгиб, кичик шов-шув сабабчисига айланган Искандар Каримов эса мезбон теннисчи Сундет Нагиметовга 2:6, 5:7 ҳисобида ютқазди.

Яна бир ҳамюртимиз Бекзод Расаматов эса қозоғистонлик Дамир Маҳмудовга 2:6, 1:6 ҳисобида имкониятни бой бериб қўйди.