"Америкалик ватанпарвар сифатида айтаманки - Чимаев ғалаба қозонганди" - Сехудо

"Менимча, аслида Хамзат бу жангда ғалаба қилди, гарчи мен Стриклендга мухлислик қилган бўлсам ҳам. Шон учун бу — унгача ҳеч ким мағлуб этмаган жангчини енгиш жиҳатидан катта ютуқ.

Шу билан бирга, менимча, жанг иккинчи раундда ҳал бўлди. Раунд бошланганидан тахминан бир ярим дақиқа ўтгач, 3:45 дақиқа атрофида Шон Стрикленд Хамзат Чимаевни ажойиб ўнг хук билан ушлаб олди. У чап жеб урди ва кейин — бум — ўнг хук тегди. Агар диққат билан қараган бўлсангиз, шарҳловчилар бунга эътибор бермаганини кўриш мумкин. Менимча, кимдир ҳақиқатан ҳам зарба қабул қилиб, мувозанатини йўқотганда, буни яхшироқ тушунтиришлари керак эди. Хамзат ҳақиқатан ҳам мувозанатини йўқотди, оёқлари чалкашиб кетди, аммо у ўзини яхши ушлади ва билинтирмади.

Бироқ Хамзат хатога йўл қўйди — зарбадан кейин дарҳол тейкдаун қилишга уринди. Сени чайқатиб юборишганида тейкдаун қилишга уринмаслик керак. У совуққон кўринишини сақлаб, оёқда қолиши ва ҳаммаси жойидадек тутилиши лозим эди. Демак, у ўзига келиб олиши керак бўлган. Аммо бунинг уддасидан чиқмади. Биринчи раундда у жуда кўп куч сарфлади, Стрикленд эса уни яхши чарчатди.

Менимча, Хамзат вазн ташлаш сабаб эрта чарчаб қолди, аммо шунга қарамай, иккинчи раунд Стрикленд фойдасига энг ишончли раунд бўлди. Мен бу жангни яна бир бор кўриб чиқишим керак, аммо кўрганларимга қараганда ҳисоб 4:1 Хамзат фойдасига ёки камида 3:2 унинг фойдасига бўлиши мумкин эди. Америкалик фуқаро, ватанпарвар сифатида объектив бўлиб, Чимаев ғалаба қилганини тан олишим керак", — деди Сехудо Pound 4 Pound with Kamaru & Henry YouTube каналида.