Анвар Анваров Бриллиант Лиганинг Шанхайдаги босқичида қатнашади

Ўзбекистон енгил атлетика федерациясининг маълум қилишича, мусобақада ҳамюртимиз Анвар Анваров иштирок этади.

Эркаклар ўртасида узунликка сакраш йўналишида дунёнинг энг сара атлетлари чиқиш қиладиган мусобақада Анвар Анваровга дунё рейтинги етакчиси италиялик Маттиа Фурлани, 4-ўриндаги Божидар Сарбоюков, 5-ўринда турган Лиам Эдкок ва яна кўплаб юлдузлар рақиблик қилади.

Бриллиант Лига Шанхай дастури бўйича энг биринчи бўлиб эркаклар ўртасида узунликка сакраш мусобақаси старт олади. Бироқ ушбу тур йил давомида ўтказиладиган Лиганинг очко жамғариш тизими бўйича ҳеч қандай очко тақдим этмайди.

Анвар Анваровнинг ўтган йилги натижалари орасида Лозанна Бриллиант Лига мусобақасида қўлга киритилган биринчи ўрин, шубҳасиз, энг юқори натижа ҳисобланади. Ўшанда Анваров 7.84 метр натижа билан барча рақибларидан устун келиб, Бриллиант Лигада ғолибликни қўлга киритган иккинчи ўзбекистонликка айланган эди.